Жаһандану үдерісінің мән-маңызының төмендеуі байқалады. Мемлекеттік ұлтшылдық, ықпал жүргізетін аумақтарды бөліске салу және әлемдік саясатта аймақтарға бөліну үрдісі алдыңғы қатарға шықты. Бұл туралы Мемлекет басшысы Қасым-Жомарт Тоқаев Ұлттық құрылтайда мәлімдеді, деп хабарлайды 7-su.kz желілік басылымы.
Демократиялық моральдық құндылықтар деп аталып жүрген құндылықтар, оның ішінде ЛГБТ көптеген елдерге ондаған жыл бойы күштеп таңылып, соның негізінде халықаралық үкіметтік емес ұйымдар мен қорлар арқылы мемлекеттердің ішкі ісіне ашық араласу белең алды. Оның түпкі мақсаты — ұрлық, яғни сан миллиардтық бюджетті жеке қалтаға салу, — деді Тоқаев.
Сонымен қатар, Мемлекет басшысы «Даму мен демократия», «адам құқықтары», «баспасөз бостандығы», «сыбайлас жемқорлыққа қарсы күрес» деп ұрандатып жүргендердің жеке байлығы олардың жалақыларына сәйкес келмейтінін атап өтті.
Президент Трамп бастаған Америка әкімшілігінің қызмет бабын асыра пайдалануға қатысты оқиғаларды анықтауға және «тұңғиық мемлекет» ұғымына тән саяси екіжүзділікті әшкерелеуге, дәстүрлі моральдық құндылықтарды қалпына келтіруге бағытталған жұмыстарын қолдауға лайықты екенін айтты. АҚШ-та жасалып жатқан шаралардың бәрі бүкіл әлемге тікелей әсер ететіні белгілі, — деп қорытындылады Мемлекет басшысы.
Фото: Ақорда
