Қазақстан Президенті Қасым-Жомарт Тоқаев Қытай Халық Республикасына 1,5 мың ақбөкен беру туралы шешім қабылдады. Бұл туралы Ақорданың ресми хабарламасына сілтеме жасап 7-su.kz ақпараттық порталы хабарлайды.
Ақбөкендер Қытайдың батыс өңіріне жерсіндірілмек. Мақсат — көрші елдегі популяцияны қалпына келтіру. ҚХР Төрағасы Си Цзиньпин бұл шешім үшін Қазақстан Президентіне алғыс айтып, Қытайда ақбөкендердің санын көбейту бағытында жүйелі шаралар қабылданатынын жеткізді.
Бұған дейін Қасым-Жомарт Тоқаев Си Цзиньпинді Астана әуежайында ресми түрде қарсы алды. Құрмет көрсету рәсімінде балалар мейманды қазақ және қытай тілінде қарсы алды.
Келіссөз барысында Президент Тоқаев Қытай халқы қазақ халқына ешқашан зиян келтірмегенін атап өтті. Өз кезегінде Си Цзиньпин көрсетілген сый-құрметке ризашылығын білдірді.
Келіссөз қорытындысы бойынша Қазақстан мен Қытай арасында 24 үкіметаралық және ведомствоаралық құжатқа қол қойылды. Атап айтқанда, тараптар жер сілкінісіне қарсы бірлескен күш салу туралы уағдаласты.
