Ақпараттық технологиялардың, ұялы байланыс пен теледидардың маңызы артқан бүгінгі күні алтыннан да қымбат уақыт зая кетіп жатыр. Әрине, есеппен, ақылмен интернетке жүгінудің жөні басқа.
Түсінген адамға интернет тек ақпарат көзі ғана емес, қарым-қатынас, ойын-сауық және білім берудің әмбебап ортасына айналып отыр. Желіге жүгінетін жандардың саны күн сайын артқан бүгінгі таңда интернеттің үздіксіз өсуіне және ауқымының кеңеюіне байланысты ондағы заңсыз материалдар да көбеюде. Сондықтан цифрлық әлемде балаларды желідегі қауіптерден қорғау маңызды мәселеге айналды. Мемлекеттік органдар осындай қауіптерге қарсы тұру үшін тиісті шараларды қабылдауда.
Дегенмен интернеттегі заңсыз әрекеттер мәселесін тек мемлекеттік құрылымдардың күшімен шешу мүмкін емес. Сондықтан БАҚ саласындағы заңнамалық талаптардың орындалуын қадағалайтын ҚР Мәдениет және ақпарат министрлігі ата-аналар үшін қолжетімді шешімдердің шолуын ұсынды.
Ата-ана бақылауы сервистері заңсыз контентке қол жеткізуді шектеуге, онлайн-әрекеттерді қадағалауға және құрылғыларды пайдалану уақытын бақылауға көмектеседі. Мәселен, Мәдениет және ақпарат министрлігі: «Kaspersky Safe Kids», «Dr.Web Security Space», «Qustodio» (Испания), «Net Nanny» (АҚШ), «Norton Family», «Kidslox», «Parental Control Kroha» (Украина), «Kidlogger» сынды контент пен сайттарды бұғаттайтын және сүзетін, экран уақытын шектейтін әрі әлеуметтік желілерді бақылайтын қосымшаларды ата-аналардың назарына ұсынады. Мәселен, «Google Family Link: Android» қосымшасы аndroid, Google Play, iOS үшін таптырмас қосымша десек, бұл өз кезегінде геопозицияны қадағалауға, экран уақытын шектеуге және орналасқан жерді анықтауға мүмкіндік береді. Сол секілді, «TikTok Family Pairing» – жасөспірімдердің TikTok-ты қолдануын бақылау, экран уақытын шектеу және контентті сүзгіден өткізу мүмкіндігі бар қосымша.
Аталған қосымшаларды жүктеп, баланың интернет пен ақпарат әлеміндегі қолданбалы ресурсын анықтауға, уақытын шектеп, не істеп, не қойып жатқанын бақылауға мүмкіндік береді. Бұл да уақыт талабына сай тәрбие мен тәлім тізгінін жіберіп алмауға жасалған оң қадам деп ұғынған жөн.
«Жетісу-Ақпарат»
Фото: mspy.com
