Кіндік қаным тамған жер,
Айтам сені ән қылып,
Ұлан-асыр салған жер,
Жүректесің мәңгілік!
Күн нұрына малынып,
Шапқыладым төсіңде.
Тасыңа да шалынып,
Құлағаным есімде.
Туған өлкем, мекенім,
Шекердей-ақ тәттісің.
Сені сүйіп өтемін,
Таусылғанша нақ күшім!
Қуантасың балаңды,
Нұрың көктен себелеп,
Қыздыратын табанды,
Туған жерім – керемет!
Анам менің
Бесігімді тербетіп,
Әлдилеген тынбастан,
Тұрғыздың ғой жерге тік,
Сан сынаққа сынбастан.
Ақ сүтіңді сіңіріп,
Бойға қуат дарыттың,
Балаң үшін жүгіріп,
Бар әлемді таныттың.
Перзентіңді өсірдің,
Құшағыңда мәпелеп.
Қатемді сан кешірдің,
Дұрыс жолға жетелеп.
Нұрландырған түнімді,
Өзің шуақ, жарықсың,
Тұлға қылар ұлыңды,
Анам менің – алыпсың!
Үлгі тұтып өзіңді,
Еріп келем артыңда.
Тағдырына төзімді,
Анам менің – тау тұлға!
Ханзада Асхат,
Ы. Алтынсарин атындағы қазақ гимназиясының оқушысы
Үшарал қаласы,
Алакөл ауданы
