Каспий теңізінің экологиялық жағдайын жақсарту мен оның флорасы мен фаунасын сақтау мақсатында Үкімет резервінен қомақты қаражат қарастырылды, – деп хабарлайды 7-su.kz ақпараттық порталы.
Мемлекет басшысының Каспийді кешенді зерттеу және өңірдің табиғи тепе-теңдігін қалыпқа келтіру жөніндегі тапсырмасына сәйкес, «Каспий теңізі Қазақ ғылыми-зерттеу институты» акционерлік қоғамына 1,1 млрд теңге бөлу туралы шешім қабылданды. Тиісті құжатқа Премьер-министр Олжас Бектенов қол қойды.
Бөлінген қаржы институттың техникалық базасын жаңартуға жұмсалады. Соның ішінде теңіз айдынында тұрақты мониторинг жүргізуге қажетті заманауи құрылғылар сатып алу мен гидробиологиялық, гидрохимиялық зертханаларды жарақтандыру көзделуде. Бұл қадам Қазақстанның теңіз секторындағы өзгерістерді дер кезінде анықтап, ғылыми негізделген деректер қорын жасақтауға жол ашады.
Бүгінгі таңда аталған ғылыми-зерттеу институты халықаралық деңгейде белсенді жұмыс істеп жатыр. Орталық Каспий маңы елдерінің жетекші университеттері мен ғылыми орталықтарының қауымдастығына мүше болып енді. Мұндай ынтымақтастық теңіз деңгейінің тартылуы мен экологиялық ластану секілді ортақ мәселелерді бірлесіп шешуге мүмкіндік береді.
Экология және табиғи ресурстар министрлігіне берілген тапсырмалар аясында алдағы уақытта Каспийдің экожүйесін сауықтырудың нақты тетіктері іске қосылады. Ал Қаржы министрлігі 1,1 млрд теңгенің мақсатты әрі тиімді жұмсалуын қатаң бақылауда ұстайды. Теңізді қорғау тек табиғатты аялау ғана емес, сонымен бірге аймақтың экономикалық және әлеуметтік тұрақтылығының кепілі екені анық.
