Наурызнама онкүндігі аясында «Жол активтері сапасының ұлттық орталығы» мекемесінің облыстық филиалында «Ұлттық спорт» күні кең көлемде аталып өтті, – деп хабарлайды 7-su.kz ақпараттық порталы.
Ұлыстың ұлы күні қарсаңындағы бұл игі шара сала қызметкерлерін бір арнаға тоғыстырып, ұлттық құндылықтарды жаңғыртуға бағытталған мазмұнды бастамаға айналды.
Мерекелік күн аясында жол саласының мамандары алдымен қол күрестен бақ сынасып, өзара мықтыны анықтады. Білектің күші мен намыстың сыналар тұсында әріптестер арасындағы тартыс ерекше қызу өтті. Одан әрі ұжым мүшелері тоғызқұмалақ пен шахмат секілді зияткерлік ойындарға қатысып, ой ұшқырлығы мен стратегиялық қабілеттерін байқатты. Бұл сайыстар қатысушылардың тек физикалық емес, рухани һәм интеллектуалдық әлеуетін де айқындай түсті.
Осындай мазмұнды басқосулар ұжым ішіндегі ауызбіршілікті арттырып қана қоймай, қызметкерлерге серпін сыйлап, ортақ мақсат жолында жұмыла еңбек етуге жетелейді. Әсіресе, ұлттық ойындар арқылы салт-дәстүрді дәріптеу – бүгінгі буынға тағылым, ертеңгі ұрпаққа аманат екені анық. Сол себепті мекеме ұжымы мұндай игі шараларды жыл сайын тұрақты түрде өткізіп келеді.
Алдағы уақытта Наурыз мейрамын кең ауқымда атап өту жоспарланып отыр. Бірнеше филиалдың басын қосатын үлкен мерекелік жиын Алматы облыстық филиалында өтпек. Ауқымды думанда садақ ату, қазақ күресі, арқан тарту секілді ұлттық спорт түрлері ұйымдастырылып, қатысушылардың белсенділігі мен рухы сыналады.
Осы орайда облыстық филиал директоры Елдар Әбенов:
– Бұл мереке – біздің мекеме үшін айрықша маңызға ие. Жыл сайын дәстүрлі түрде ұйымдастырылып келеді. Биыл да бірнеше филиал бірігіп, ауқымды деңгейде атап өтуді жоспарлап отырмыз. Оған мекеменің әр өңірінен келген 400-ден астам қызметкер қатысады. Мұндай шаралар ұжымның ынтымағын нығайтып, ортақ рух қалыптастыруға зор ықпал етеді, – деп атап өтті.
Расымен де, ұлттық спорт – рухты көтеретін, бірлікті бекемдейтін құндылық. Осындай тағылымды шаралар арқылы ұжым ішіндегі татулық артып, ұлттық мұраға деген құрмет тереңдей түсетіні сөзсіз.
