Биыл Қазақстан халқы Ассамблеясының құрылғанына 30 жыл. Татулық пен бірлікті, ұлтаралық достықты, қарым-қатынасты насихаттап келе жатқан бірегей қоғамдық ұйымның іс-нәтижелері қазір республикамыздың барлық өңірлерінде дерлік халықтың қатысуымен сараланып, сарапталып, нәтижелі игіліктері баршаға жарқырата көрсетілуде.
Мемлекет басшысы Қасым-Жомарт Тоқаевтың төрағалығымен өткен Қазақстан халқы Ассамблеясының XXXIV сессиясында ҚХА-ның құрылғанына 30 жыл толуы еліміздің тарихындағы маңызды белес ретінде аталып өткен болатын. Президент өз сөзінде: «Жұртымыз үшін ең үлкен марапат – елдің тыныштығы. Береке-бірлігімізді сақтай алмасақ, қастерлі Тәуелсіздігіміздің баянды болуы да екіталай», – деп атап өтті. Алқалы басқосуда Ассамблея жұмысына жаңа серпін беру, этносаралық татулық пен келісімді нығайту және Ассамблеяның аймақтардағы жұмысын жандандыру жөніндегі мәселелер жан-жақты талқыланып, нақты шешімдер де қабылданған болатын.
Соның нәтижесінің бір көрінісі әртүрлі этностар тығыз орналасқан өңірлер – Қордай, Ұйғыр, Сайрам, Панфилов және басқа да өңірлерде халық Ассамблеялары жұмыс жасай бастады. Ежелден ұлттар достығының ұясына айналған жазиралы Жаркент өңірінде де аудандық Қазақстан халқы Ассамблеясы құрылып, алғашқы сессиясы өтті.
Шараны аудан әкімі Марат Сағымбек кіріспе сөз сөйлеп ашып, қатысушыларға аудандық Қазақстан халқы Ассамблеясының төрағасы мен мүшелері сайланатын сессияда басқа да қаралатын мәселелерді атап өтті. Аудандық Қазақстан халқы Ассамблеясының төрағасы болып Марат Рақымбердіұлы сайланды.
Жиын барысында Қазақстан халқы Ассамблеясының мүшесі Ермек Келемсейіт, аудандық ардагерлер ұйымының төрағасы Тоқтарбай Керімқұлов, аудандық ұйғыр этномәдени орталығының төрағасы Азат Гайтов, аудандық «Қазақ анала- ры – дәстүрге жол» РҚБ төр-айымы Ләззат Бабаханова сөз сөйлеп, ел бірлігін нығайту жолындағы өз ой-пікірлерімен бөлісті.
Қазақстан халқы Ассамблеясы жанындағы құрылымдардың жұмысын жандандыру, аудан көлемінде этносаралық келісім мен қоғамдық тұрақтылықты сақтау бағытындағы жоспарлар талқыланған сессия жұмысын қорытындылаған Марат Рақымбердіұлы қатысушыларды бірлік пен татулықты нығайту жолында аянбай еңбек етуге, Қазақстан халқы Ассамблеясының аймақтық құрылымдарының жұмысын жүйелі түрде дамытуға шақырды.
Мырзағали НҰРСЕЙІТ
Панфилов ауданы
