Мәжілістің жалпы отырысында Қаржы министрі Мәди Такиев 2024 жылғы республикалық бюджеттің атқарылуы туралы Үкімет есебін таныстырды, деп хабарлайды 7-SU.KZ ақпараттық порталы BAQ.KZ сайтына сілтеме жасап.
Министрдің баяндамасына сәйкес, фискалдық және бюджеттік қиындықтарға қарамастан, өткен жылдың қорытындысы оң болды. Мемлекеттің әлеуметтік міндеттемелері толық орындалды, ал жалпы ішкі өнімнің нақты өсуі 4,8%-ды құрады.
2024 жылы бюджет түсімдері 98%-ға орындалып, шамамен 20 трлн теңге түсті. Шығыстар 23 трлн 594 млрд теңгеге жүзеге асырылды. Бюджет тапшылығы белгіленгеннен 3 трлн 649 млрд теңгеге азайып, жалпы ішкі өнімнің 2,7%-ын құрады. Инфляция деңгейі 2023 жылмен салыстырғанда 9,8%-дан 8,6%-ға дейін төмендеді, — деді Такиев.
Үкімет өңірлерді қолдауға 7,1 трлн теңге, әлеуметтік салаға 8,8 трлн теңге бөлді. Сонымен қатар су тасқынын жою, жылу жүйелерін жаңарту және ауылдық денсаулық сақтауды дамыту сияқты маңызды жобаларға бюджеттен қосымша қаржы қаралды.
Такиевтің айтуынша, Мемлекет басшысының тапсырмасына сәйкес, базалық зейнетақы мөлшері кезең-кезеңімен арттырылып, ең төменгі мөлшері күнкөріс деңгейінің 60%-дан 65%-ға дейін өсті.
2024 жылы ең төменгі жиынтық зейнетақы 86 068 теңге болса, ең жоғары мөлшері 197 873 теңгеге жетті. Сонымен қатар ынтымақты зейнетақы 9%-ға индекстелді.
Мемлекеттік әлеуметтік сақтандыру қорынан төленетін әлеуметтік төлемдер 7%-ға өсті. 2024 жылы еңбекке жарамсыз және асыраушысынан айырылған 1,3 млн адамға 958,3 млрд теңге, 541 мың мүгедек адамға 477,3 млрд теңге және 1,3 млн балалы отбасыға 652 млрд теңге әлеуметтік төлемдер төленді, — деп баяндады Қаржы министрі.
