Биыл өңір халқының қажеттілігіне байланысты азық-түлік тауарларын дайындау көлемін өткен жылдармен салыстырғанда 20%-ға ұлғайту туралы шешім қабылданды.
Жалпы мөлшері 9,5 мың тоннадан асады. Енді 19 түрлі өнім қара күзден жаз шыққанша халыққа белгіленген бағамен сатылады. Олардың 16-сы тікелей Жетісуда өндіріледі, сырттан тек қарақұмық, тұз және күнбағыс майы сатып алынады. Тауарлар Талдықорған қаласындағы әлеуметтік дүкендер желісінде сату басталды.
– Белгіленген бағалар сақталады. Біз негізінен нарықта ең төмен баға қалыптасқан кезде өнім сатып аламыз. Бұл, әдетте, көктемгі дала жұмыстары кезінде, бағалар төмен және оңтайлы болады. Дәл осы уақытта біз бағаның көтерілуі кезінде тауарлық интервенция жүргізіп, нарықты тұрақтандыру бойынша шаралар қабылдау үшін сатып алуға тырысамыз, – дейді «Жетісу» әлеуметтік-кәсіпкерлік корпорациясының әлеуметтік жобалар департаментінің директоры Бақтияр Сембеков.
Көкөніс өсіруші Ескендір Жайлығұлов осымен бесінші жыл өз егістіктерінде өсірілген сәбіз бен пиязды жергілікті тұрақтандыру қорының қоймаларына жеткізіп келеді. Ол өнім бағасының бірден бекітілетінін айтты. Шарт бойынша жергілікті әлеуметтік-кәсіпкерлік корпорация көктемгі егіс жұмыстарын жүргізу үшін аграрилерді пайызсыз несиемен қамтамасыз етеді.
– Тиімді ынтымақтастық. Ең бас- тысы – несиені уақытылы төлеу. Биыл мен 330 тоннадан аса пияз, 400 тоннаға жуық сәбіз жинадым. Келесі маусымда егу көлемін екі есеге арттыруды жоспарлап отырмын, – дейді Ескендір Жайлығұлов.
Тұрақтандыру қоры өкілдерінің айтуынша, жыл сайын көкөніс өнімдерін жеткізумен аймақтағы бес ірі шаруашылық айналысады.
Облыстың тұрақтандыру қорының қоймасына қазір 5 мың тоннаға жуық көкөніс түрлері салынуда. Келесі жылдың сәуір айына дейін сәбіз, қырыққабат, картоп пен пияз халыққа белгіленген бағамен сатылады.
– Мұндай жағдай зейнеткерлер үшін жақсы әрі өте тиімді. Сондықтан, бұл үлкен қолдау. Дүкендерге май, жұмыртқа, көкөністер жеткізілуде. Егер базарда сатылатынмен салыстырсақ, әрине, әлеуметтік дүкендегі бағалар айтарлықтай төмен, – дейді Талдықорған қаласының тұрғыны Людмила Хрипунова.
Мұндай пікірге қала тұрғыны Марина Буби де қосылды. Айтуынша, бұл дүкенде барлығы әлдеқайда арзан. Супермаркеттерде 5 литр күнбағыс майы 5 мыңға жуық, ал мұнда 2 мың теңгеден асады. Айырмашылық бар. Көпбалалы отбасылар мен аз қамтылғандар үшін бұл өте тиімді.
Қазір облыс орталығында 7 әлеуметтік дүкен жұмыс істейді. Жақында тағы 5-уі пайда болады. Келесі жылы мұндай нүктелер аймақтың басқа аудандарында да ұйымдастырылатын болады.
Айгүл БАЙБОСЫНОВА
Талдықорған қаласы
