Мемлекеттік қызмет – абыройлы міндет. Ал осы міндеттің мінсіз атқарылуы мемлекеттік қызметшіге байланысты. Мемлекет пен халық арасына алтын көпір болатын мемлекеттік қызметшіні қызметке іріктеу, жауапты әрі маңызды шара. Бұл орайда, мемлекеттік қызмет істері агенттігінің бастамасымен мемлекеттік қызметке іріктеудің жаңа пилоттық жобасы енгізілді. Қазақстан Республикасы Денсаулық сақтау министрлігі санитарлық-эпидемиологиялық бақылау комитеті Жетісу облыстық санитарлық -эпидемиологиялық бақылау департаменті биыл 1 шілдеден бастап жаңа жобамен жұмысқа қабылдау жүргізуде.
Мемлекеттік қызметке іріктеу, қабылдау процесін толық цифрландыру үшін «Е-қызмет» жүйесінің жаңғыртылғандығын атап өткіміз келеді. Бұл жүйе мемлекеттік қызметке үміткерлерді артық құжат жинаудан құтқарды. Енді аталмыш жүйе өзге мекемелерден үміткер туралы ақпарат алу, соттылығы, заң бұзушылықтарға қатысы бар-жоғы, үміткердің конкурс талаптарына сай келуін автоматты түрде көрсетеді.
Қазіргі таңда мемлекеттік қызметке орналасу бойынша өткізілетін конкурстық рәсімнің барлық кезеңі қашықтан, яғни, онлайн өткізіледі. Бұл дегеніміз, мемлекеттік қызметке үміткер еліміздің немесе дүниежүзінің қай өңірінде жүрсе де аталған конкурсқа қатыса алады.
Мемлекеттік қызметке жаңаша іріктеу жүйесінің бір ерекшелігі — іріктеу кезеңдерінен өту кезінде анонимділікті қамтамасыз ету үшін әрбір жеке тұлғаға ID нөмірі беріледі. Сол арқылы конкурстың шынайы, әділ, ашық өтетіндігін тәуелсіз прокторинг жүйесі қамтамасыз етеді.
Пилоттық жобаның жаңа іріктеу тәсілінде үміткер «Eqyzmet.gov.kz» сыртқы интернет-порталында 4 заң бойынша және мемлекеттік тілді білу тестілеуінен 1 аптаның 24 сағатында өту мүмкіндігіне ие. Тестілеу қорытындысында оң нәтиже алған үміткер әрі қарай аталған порталда жеке қасиеттерді, мәтіндік және сандық ақпаратпен (SHL) жұмыс істеу қабілетін бағалау, эссе жазу (басшы лауазымдар үшін), мемлекеттік органның конкурстық комиссиясында әңгімелесуге қатысу кезеңдерінен өтеді.
Мемлекеттік қызметке іріктеудің уақытша қағидалары бойынша үміткерлерге «Eqyzmet.gov.kz» сыртқы интернет-порталында мемлекеттік қызмет істері агенттігі тарапынан арнайы көмекші құрал ретінде жадынама әзірленген. Аталған көмекші құралда конкурсқа қатысудың қадамдары, үміткерлерге қойылатын талаптар, тестілеу бағдарламасы, іріктеу және конкурс кезеңдерінің сипаттамасы толықтай көрсетілген. Мемлекеттік қызметкер адал, жауапты, қарапайым, халыққа жақын болуы тиіс. Ол әдепті, көппен тіл табыса алатын, өзіне қойылған талапты уақытында орындайтын білікті болуы шарт.
Жетісу облысының санитарлық-эпидемиологиялық бақылау департаменті – санитарлық-эпидемиология саланың мамандарын мемлекеттік қызметке іріктеу кезеңдерінен сүрінбей өтіп, еліне адал қызмет атқаратынына сенім білдіреді.
Заманай Сайынова,
Жетісу облысы СЭБД персоналды басқару қызметінің бас маманы
Фото: egov.kz
