Мәжіліс депутаты және «Ардагерлер ұйымының» төрағасы Бақтығожа Ізмұхамбетов жаңа Конституция жобасына егде жастағы азаматтар үшін өте маңызды әлеуметтік және құқықтық кепілдіктер енгізілгенін мәлімдеді. Бұл өзгерістер ұрпақтар сабақтастығын сақтау мен қариялардың тұрмысын жақсартуға бағытталған, – деп хабарлайды 7-su.kz ақпараттық порталы.
Жаңа Ата заң жобасында мемлекет әрбір азаматтың жалақысы мен зейнетақысының ең төменгі мөлшеріне тікелей кепілдік береді. Бұл жасына, денсаулық жағдайына немесе мүгедектігіне қарамастан, ешбір адамның назардан тыс қалмайтынын білдіреді. Сондай-ақ мемлекет қайырымдылық пен әлеуметтік қамсыздандырудың жаңа нысандарын дамыту міндетін мойнына алып отыр.
Бұрынғы консультативтік органдардың орнына «Қазақстанның Халық Кеңесі» құрылады. Оның құрамына барлық өңірлерден өкілдер енеді. Бұл егде жастағы тәжірибелі мамандар мен ардагерлерге мемлекеттік деңгейдегі маңызды шешімдер мен заңдарды талқылауға тікелей қатысуға мүмкіндік береді. Осылайша, аға буынның білімі мен тәрбиесі ел болашағын қалыптастыруда басты рөл атқармақ.
Жаңа жобада ерекше көңіл бөлінген тұс отбасылық ынтымақтастық. Кәмелетке толған және еңбекке қабілетті балалардың өздерінің еңбекке жарамсыз ата-аналарына қамқорлық жасау міндеті енді Конституция деңгейінде бекітіледі. Бұл қазақы тәрбие мен заңның ұштасқан жері.
Бақтығожа Ізмұхамбетов егде адамдардың интернеттегі алаяқтыққа жиі алданатынын ескере отырып, жаңа Ата заңда жеке деректерді қорғау бойынша арнайы норма енгенін жеткізді:
-
Жеке деректердің құпиялылығы: Интернет-кеңістікте ақпаратты заңсыз пайдалануға тыйым салынады.
-
Банк салымдарының кепілдігі: Мемлекет азаматтардың жинақтары мен қаржылық операцияларының қауіпсіздігіне жауап береді.
-
Қолжетімді медицина: Цифрлық сауаттылығы төмен қарияларға мемлекеттік қызметтер мен медициналық көмекті алуда барынша жағдай жасалады.
Сонымен қатар, ардагерлер қауымы Конституцияда экологиялық мәдениет пен табиғатқа ұқыпты қарау қағидатының бекітілгенін жоғары бағалап отыр.
