2025–2026 оқу жылында қазақстандық білім беру ұйымдарына 10 мыңнан астам жас мұғалім жұмысқа орналасты, – деп хабарлайды 7-su.kz ақпараттық порталы Оқу-ағарту министрлігіне сілтеме жасап.
Министрліктің мәліметінше, Мемлекет басшысы Қасым-Жомарт Тоқаевтың қолдауымен қабылданған кешенді шаралардың арқасында жастардың педагогикалық мамандыққа қызығушылығы артып келеді. Соңғы бес жылда педагогика бойынша оқып жатқан студенттердің шәкіртақысы екі есеге өсіп, жаңа оқу жылынан бастап 84 мың теңгені құрады.
2004–2005 оқу жылында шамамен 1800 «Алтын белгі» иегері педагогикалық мамандыққа түскен болса, биыл олардың саны 2 мыңнан асты. Бұл – үздік түлектердің шамамен 23 пайызы ұстаздықты таңдағанын көрсетеді.
Жас педагогтерді қолдау үшін арнайы курстар, әдістемелік бағдарламалар әзірленіп, тәжірибелі тәлімгерлермен жұмыс жүйесі енгізілген. Сондай-ақ ауылдық жерлерге кадр тарту мақсатында «Дипломмен – ауылға» бағдарламасы тұрақты түрде жүзеге асырылуда.
Министрлік мәлімдегендей, мұғалімдердің біліктілігін арттыру, қоғамдағы мәртебесін көтеру және сапалы білім беру ортасын қалыптастыру – мемлекеттік білім беру саясатының басты басымдықтарының бірі болып қала береді.
