Жалпы аймақта 12 демалыс лагері болса, қазір бәрі де балаға лық толы. Сондықтан оқушылардың қауіпсіздігі мен денсаулығына ерекше мән беріліп отыр. Әсіресе айдынды Алакөл жағасында үш лагерь жұмыс істеп, демалатын балаларды жан-жақтан қабылдауда. Соның бірі Алакөл ауданы Үшарал қаласында «Жансая» оңалту орталығының Ақшидағы мүмкіндігі шектеулі балаларға арналған сауықтыру лагері еді.
Оңалту орталығының басшысы Берік Серғазиннің айтуынша, мекеме медициналық, психологиялық, кәсіптік және әлеуметтік оңалту шарасын жүргізу арқылы мүмкіндігі шектеулі балалардың әлеуметтік мәртебесін көтеру және оны ортаға бейімдеуге бағыттау.
– Балалармен білікті мамандар жұмыс істейді. Дефектолог, психолог, логопед, емдік дене шынықтыру, емдік сылап-сипау, еңбек терапиясы инструкторы, дене тәрбиесі, музыка, сондай-ақ, невропатолог, психиатр, терапевт, педиатр, ортопед дәрігер мамандары қызмет көрсетеді, – дейді «Жансая» оңалту орталығының басшысы.
Лагерьде санитарлық-эпидемиологиялық бақылау басқармасы мамандарының бекіткен мәзірімен төрт уақыт тамақ беріледі. Балалар бос уақытында би билеп, көңілді кештер ұйымдастырып, ортаға бейімделуге тырысады.
– Лагерьге 6-18 жас аралығындағы мүгедектігі бар балалар демалуда. Олардың әлеуметтік, шығармашылық бағытын дамытуды басты мақсат етеміз. Биылғы каникулда бір аптадан 10 топқа бөліп, 160 баланы қабылдауды жоспарлағанбыз. Олармен бірге ата-анасы немесе заңды өкілі бірге келеді. Қазіргі таңда 80 пайыз баланы қабылдап, көңілді демалыс өткізуіне мүмкіндік бердік. Осы маусымда демалатын балаларға қызмет көрсетуге 26 маман берілген. Бәрі де балаларға жақыннан жәрдемші болып жүр, – дейді «Жансая» сауықтыру лагерінің меңгерушісі Бағдагүл Алдабергенқызы.
Лагерьге барғанда балалар кешкі үзілістегі мәдени шараға қатысып жатыр екен. Олардың көңілді кешке жан-тәнімен араласып кетуге денсаулықтары жар бермегенімен, жүздерінде күлкі, жүректерінде жайлы тірлікке деген бұлқыныс жатқанын көрдік. Ал біраз балалар ойын залында, енді біреулері демалыс бөлмесінде түрлі ойыншықты құрастырып, әбігер болып жатқанына куә болдық. Айта кетерлігі, лагерьдің жеке жағажайы бар. Балалар күн көтеріліп, су жылығанда жүзуге жаттықтыратын маманның көмегімен тәулігіне 3-4 рет емдік суға шомылып тұрады. Бұл кезде топ жетекшілер мен құтқарушылар да балалардың қауіпсіздігін көз жазбай бақылап тұрады.
Қажет Андас
Ақши ауылы
Алакөл ауданы
