Қабылдау кешіне ҚазҰУ-дың Қиыр Шығыс кафедрасының профессорлық-оқытушылық құрамы мен жапонтану бөлімінің білімгерлері қатысты. Сонымен бірге, кештің қадірлі қонақтары ретінде Қазақстанға оқуға келген Токио университеті, София университеті, Токио шет тілдер университеті, Кобе университетінің студенттері де шақырылды.
Кездесу барысында алғаш болып Қиыр Шығыс кафедрасының меңгерушісі Ақерке Абаған және жапонтану бөлімінің меңгерушісі Мадина Шадаева сөз сөйлеп, 1-курс студенттерін оқудың басталуымен құттықтап қойды. Содан соң Қиыр Шығыс кафедрасының аға оқытушысы, 2-курс студенттерінің куратор-эдвайзері Гульмира Тазабекова ұйымдастыруымен дайындалған жапонтану бөлімінің 2-курс студенттерінің арнайы концерттік бағдарламасы көрермен назарына ұсынылды.
Іс-шара аясында 2-курс студенттері Бимукан Шарипов, Таңжарық Тайыржанұлы, Сергей Данильченко, Ева Корнилова, Данил Горенко, Амир Тыныбеков жапон және орыс тілдерінде танымал әндерді орындап берді. Сонымен қатар, Ева Корнилова мен Томирис Рахметова «Ками но мани мани» атты жапон биін билесе, Айғаным Сағатбек мен Сая Болатбек «Алтыным» әнін орындап берді. Сондай-ақ, академиялық ұтқырлық бағдарламасы негізінде бір жыл бойы ҚазҰУ-да білім алған жапондық студент, Кадзухиро Уно Қазақстан жөнінде арнайы өзінің бейнеролигін дайындап, көрермен назарына ұсынды.
Қабылдау кешінің соңғы бөлігінде күншығыс елінің тарихы мен мәдениетіне қатысты презентациялар көрсетілді, викториналар мен ойындар ұйымдастырылды. Дұрыс жауап берген студенттерге құнды сыйлықтар таратылды. Концерттік бағдарлама аяқталғаннан кейін жиналған қауым үшін кішігірім дастархан жайылып, фуршет ұйымдастырылды. Іс-шара өте жылы және достық жағдайда өтті.
Г.Тазабекова,
Қиыр Шығыс кафедрасының аға оқытушысы
