Талдықорған қаласының әкімі Ернат Бәзіл аймақтағы спортшыларды кәсіби мерекесімен құттықтап, түрлі жарыстарда топ жарып жүрген бірқатар жеңімпаздарға сый-құрмет көрсетті.
Облыс орталығындағы Тіл сарайында өткен салтанатты шараға өңірдегі спорт саңылақтары, ардагерлер және басқа да саланың жетекші мамандары қатысты. Осы орайда Жетісу өлкесін шартарапқа танытып жүрген жас шабандоз Хамза Амангелді және оның әкесі Марлан Бектенов «Жетісу Батыры» төс белгісімен марапатталды.
– «Бүгінгі біздің спортшыларымыздың жетістіктері халқымызды рухтандырып, жігерлендіріп, кеудеге елімізге деген үлкен мақтаныш сезімін ұялатады. Бұған дәлел Париж Олимпиадасындағы алтын медаль иегері дзюдошы әлемді таң қалдырған Елдос Сметовтың абройлы жеңісі деп білемін. Бүгінде саңылақтарымыз төрткүл әлем көз тіккен байрақты бәсекелерде Қазақстанның намысын абыроймен қорғап, жүрт алқауына бөленіп келеді. Бұл біз үшін зор мақтаныш, үлкен жеңіс», – деді жиналған қауым алдында сөз алған қала әкімі.
Шара барысында шаһар басшысы бірқатар спортшыларға дене шынықтыру және спортты дамытуға сіңірген еңбегі үшін арнайы Алғыс хаттар мен бағалы сыйлықтар табыстады.
Айдын КӘЛІМХАН
