Талдықорғандағы Жетісу аймақтық «Jetisu Digital» ІТ-хаб базасында өткен ірі республикалық Decentrathon 4.0 офлайн-хакатонына ІТ-мамандар, студенттер және заманауи технологияға қызығушылық танытатын жандардың барлығы қатысты. Барлығы 150-ден астам адам, –деп хабарлайды Жетісу облыс әкімінің баспасөз қызметі.
Хакатонды ҚР Цифрлық даму, инновация және аэроғарыш өндірісі министрлігінің қолдауымен және облыстық цифрлық технологиялар басқармасының ықпал етуімен «Astana Hub» және «Blockchain & AI Technology Center» (BAITC) ұйымдастырыпты. Мұндай ауқымды шара Талдықорғанды қосқанда 20 өңірде өткізілді.
– Бұл шара Мемлекет басшысының Жолдауын жүзеге асыру аясында өткізіліп отыр. Осыған орай жасанды интеллектіге баса көңіл бөлінуде, яғни, қатысушы командалар көптеген бағыттар бойынша бақ сынасты, оның ішінде жасанды интеллекті қолдану арқылы түрлі жобаларды жүзеге асыруға болатынын шеберлікпен көрсетті. Біріншілікке қатысқан 150-ден астам адамның жасы әрқилы. Мысалы, олардың ішіндегі ең жасы 12 жаста болса, ең ересегі білікті маман болып қалыптасқан жан. Осыған қарап хакатон әрбір талантты адамның қарым-қабілетін заманауи ІТ-технология саласында көрсетуге мүмкіндік беретінін көрдік, – дейді басқарма басшысы Айдын Темірбаев.
Ұйымдастырушылардың айтуынша, бірнеше күнге созылған хакатон бірнеше кезеңге бөлінген. Қатысушылар тәжірибелік тапсырмаларды орындап, ең жылдам блокчейн-желілердің бірінің көмегімен жобалар құрастырды, жасанды интеллект саласындағы кейстерді жетілдіру жолында жобалауды, бағдарламалауды және дайын ІТ-шешімдер жасауды тәжірибелі менторлардың қолдауымен меңгерді.
– Өте қызықты тәжірибені бастан өткердік. Жарыс кезінде өзіңді мемлекетті өзгертетін, келешекті қалыптастыратын алып қозғалыстың бір бөлшегіндей сезінесің, осының бәрі өзіміздің Талдықорғанда өтті, – дейді жарысқа қатысқан Талдықорғандағы Назарбаев зияткерлік мектебінің оқушысы Диана Хасимова.
Бұл хакатонның жеңімпаздары жақында Астанада өтетін «Digital Bridge – 2025» технологиялық форумында белгілі болады. Мұндай шара үздік командалардың жобаларын кеңінен таныстыруына, инвесторлардың назарын аудартуға және тиімді идеялардың жүзеге асуына мүмкіндік береді.
