Өскелең ұрпақтың бойындағы моральдық- адамгершілік қасиеттерді қалыптастыру, жастардың патриоттық рухын көтеру, Отансүйгіштікке тәрбиелеу мақсатында өткізілген шараның ашылу салтанатында облыстық білім басқармасы басшысының орынбасары Қайрат Қасымов клубтың іске қосылуы – болашақ сарбаздардың үлкен жеңістерге қадам басуының айғағы екенін айтып, ізгі тілегін білдірді.
Осыдан кейін №21751 әскери бөлім командирінің тәрбие жұмысы жөніндегі орынбасары, подполковник Азамат Қонысбаев пен Ауған соғысының ардагері Қайрат Жаңабаев жас сарбаздарға арнайы куәлік табыстады.
Келесі кезекте «Жас сарбаз» әскери-патриоттық клубының ашылуына демеушілік жасап, әскери киіммен қамтамасыз еткен жеке кәсіпкер Диас Нөкербеков пен Көксу шекара бөлімшесінің бастығы, майор Нұрмұхаммед Исмайыл және Рудничный ауылдық округінің әкімі Сергей Вишняков жас сарбаздарға сәттілік тілеп, ыстық ықылас білдірді.
Шара барысында жаңа кабинеттің ішін аралап, жұмыспен танысқандар клубтың құрамына қабылданған 19 жас сарбазға бар жағдай жасалғанын көрді. Мұнда шахмат, дойбы, үстел теннисі сынды спорттық және зияткерлік ойындарға арналған жабдықтар қойылған.
«Айналайын» балалар үйінің директоры Гүлмира Ахметова:
– «Жас сарбаз» кабинетінде балаларға әртүрлі тақырыпта патриоттық дәріс беріледі. Сондай-ақ, біз әскери бөлімдермен, шекарашылармен бірлесіп түрлі шара ұйымдастырып, тығыз қарым-қатынаста жұмыс істейміз. Шекара қызметкерлері және Талдықорған әуе базасымен меморандумға отырып, әскери базаларға экскурсия өткізуді жоспарлаудамыз, – дейді.
«Жас сарбаз» клубының мүшесі Әнел Молдағалиева: «Біз қазір әскери саптық жүрісті, патриоттық ән айтуды үйреніп жүрміз. Тәртіп пен жауапкершілікті бәрінен жоғары қою керектігін түсіндік. Жас сарбаздар клубы – біздің жігеріміздің бастауы», – деді.
Шара соңында жас жауынгерлер әуелі «АК-74» автоматын толық жинау және бөлшектеу әдістерін пысықтап, саптық дайындықтарын көрсетті.
Айдар ҚАЛИЕВ
