Бүгін Алматы облысының әкімі Амандық БАТАЛОВ мемлекеттік қызметшілерді және тәртіп сақшыларын кәсіби мерекелерімен құттықтады. Айта кетейік, 23 маусымда Қазақстанда қос кәсіби мереке аталып өтеді. Ол — Мемлекеттік қызметшілер мен Полиция күні.
— Құрметті мемлекеттік қызметшілер! Сіздерді Қазақстан Республикасының мемлекеттік қызметшісі күнімен құттықтаймын! Мемлекеттік қызметкер болу – халық пен билік арасында алтын көпір болу, қоғам мен мемлекет тарапынан артылған үлкен сенім, — деген облыс басшысы сенімді ақтау, міндетті мінсіз орындау, халыққа риясыз қызмет ету – мемлекеттік қызметшінің қастерлі парызы екенін жеткізді. — Елдің әлеуметтік-экономикалық дамуының жауапкершілігі ең алдымен мемлекеттік қызметшіге жүктеледі. Бұл ретте Алматы облысының мемлекеттік қызметшілері елдің өркендеуіне бар күш-жігерін жұмсап, аса жауапты жұмысты абыроймен атқарып, халық сеніміне ие болуда. Осы мерейлі мерекемен сіздерді құттықтай отырып, ел игілігі жолындағы қызметтеріңізге табыс, отбасыларыңызға береке-бірлік, елімізге тыныштық тілеймін!
Аймақ басшысы қоғам тыныштығын күзеткен тәртіп сақшыларына да жүрекжарды лебізін арнады.
— Құрметті полиция қызметкерлері! Сіздер өз өмірлеріңізді елдің тыныштығын, азаматтардың қауіпсіздігін қамтамасыз ету мен қылмыспен күрес жолына арнап келесіздер. Полицияда қызмет ету – аса жауапты да қауіпті, сонымен бірге игілікті іс, — деді Амандық Баталов.
Өз сөзінде ол полиция қызметкерлерінің өмірі қауіп-қатерге толы болатынын, сонда да өз мамандығына адалдықпен берілген жандар қандай құрметке де лайық екенін әңгімеледі.
— Күнделікті қызметтік міндеттерін атқара жүріп, полиция қызметкерлері түрлі қауіппен бетпе-бет келетін кездері де аз емес. Өз өмірі мен денсаулығын қатерге тіге отырып, жетісулық тәртіп сақшылары өзіне жүктелген міндетті абыроймен атқарып, кәсібилік танытып келеді. Сондықтан, сіздерге түрлі кезеңдер мен жағдайларда мемлекеттің тұрақтылығын қамтамасыз етуге, елдің дамуына зор үлес қосқандарыңыз үшін алғыс айтамын. Полиция қызметкерлері мен ардагерлерін кәсіби мерекелерімен құттықтаймын! Сіздерге мықты денсаулық, қажымас күш-жігер, шаңырақтарыңызға шаттық тілеймін! — деп түйіндеді сөзін облыс әкімі.
«ЖЕТІСУ-АҚПАРАТ»
