Облыс әкімінің Панфилов ауданына жұмыс сапарынан бір күн бұрын жазиралы мекенге жол алған журналистер қауымы назардағы нысандарды араладық. Алдымен Көктал ауылының жеті көшесіне тартылып жатқан ауызсу желілерінің жұмысымен танысып, тұрғындардың тілегін тыңдадық. Ағайынның қуанышы қосқабат, тілегі тілдің ұшында екеніне көзайым болдық.
Бүгінде 12 мыңнан астам тұрғын мекен етіп жатқан Көктал ауылдық округіндегі күрмеуі шешілмей келе жатқан жайттың бірі – ауызсу мәселесі болған. Әсіресе «Жаңақұрылыс» аталып кеткен Көктал ауылының солтүстік-шығысындағы 6 және 40 үйлі «зауыт көшесі» аталған көшенің тұрғындары таза суды алыстан тасумен діңкелейтін. Осынау мәселені жыл басында облыс әкімінің кездесуінде көтерген көкталдықтар: «Мөлдір суға мейір қандырар күн жақын» деп қуанып келеді. Облыс басшысының тікелей қолдауымен шешімін тапқан істің игілігін көретін күн де жақындапты.
Жазиралы мекендегі тұрғындары ең көп ауылдың бірі – Көктал. Жалпы Ақжазық, Аққұдық және Көктал ауылы кіретін округтегі халықты айтпағанда, аталмыш елді мекенде 10 мыңға жуық адам тұрады. Ал мұндағы 7 көшенің жыры көп жылдан бері жаңғырып келген.
– Жолдасым 30 жылдан бері осы жерде тұрады. Мен келін болып түскелі бері ауызсуды алыстан тасып келгенмін. Қара жолдың қатқағы мен көктем-күздің батпағында алыстан су тасып келген ауыл азаматтарының мехнатын жыр қылғалы көп болған. Енді, міне, сол қиыншылықтан құтылып, іргемізге мөлдір су келді. Бұдан асқан қуаныш жоқ біз үшін, – дейді ауыл тұрғыны Майгүл Жұбанова. Ал, Көктал ауылдық ақсақалдар алқасының төрағасы Сайлау Солтанқұлов ел азаматтарына ақ батасын арнады.
Айта кетерлігі, құрылыс басында 30 адам, 12 техника жүр. «Темірқазық-стройпроект» ЖШС жүргізіп жатқан жұмыстың 90 пайызы біткен. Жалпы 7 көшеге 30 км. су құбыры тартылуда. Қарашаның соңына дейін ел игілігіне беріледі деп күтілуде. Сонымен қатар Панфилов ауданында ауызсудың сапасын жақсарту мақсатында биыл республикалық бюджеттен 3,8 млрд. теңге бөлініп, Еңбекші, Көктал, Надек, Қырыққұдық, Шолақай ауылдарында су құбыры желілерін жаңғырту жұмыстары жүргізілуде.
Өз кезегінде журналистер қауымы Н. Головацкий орта мектебіне барып, күрделі жөндеуден кейін ел игілігене берілген алтын ұяны аралады. 1986 жылдан бері жөндеу көрмей, тозығы жеткен мектептің жөндеу жұмысы былтыр қараша айында басталып, жаңа оқу жылында пайдалануға берілген. 1,7 млрд. теңгеге жаңғыртылған мектеп туралы зейнеткер ұстаз Гүл-бархан Әбдіманапова:
– Өткен жылы облыс әкіміне алғаш салынғаннан жөндеу көрмеген мектебіміздің жырын айтып едік. Тозығы жеткен білім ордасының жай-күйі бүгін адам нанғысыз жағдайда жаңғыртылды, жақсарды. Ел тілегін ескеру деген осы ғой, шексіз ризамыз, – дейді бір кездері аталған мектепте директор, орынбасарлық қызметтерді атқарған, 35 жыл маңдай терін білім саласында шүмектеткен жан.
Шындығында Н. Головацкий орта мектебі жаңа кейіппен жарқырай көз қуантады. 1050 орынды білім ордасында бүгінгі таңда 800-ге жуық өрен оқып жатыр.
Асыл СҰЛТАНҒАЗЫ
Панфилов ауданы
Суретті түсірген Жеңіс ЫСҚАБАЙ
