Облыс аумағындағы 43 ірі су көзі жай тынығу мекені ғана емес, тәртіп пен сақтықты талап ететін орын. Биыл Талдықорғандағы қалалық жағажай, Алакөл мен Балқаш көлдерінің белгілі бір аумақтары ғана ресми түрде шомылуға рұқсат етілген. Ал өзге су айдындарында арнайы ескерту белгілері орнатылып, шомылуға тыйым салынған.
Осыған орай облыстық ТЖД тарапынан кешенді жұмыс жүргізілуде. Құтқару бекеттері, медициналық пункттер, дронмен патрульдеу жүйесі іске қосылып, жадынамалар таратылып жатыр.
Облыстық ТЖД мемлекеттік өрт бақылау басқармасының аға инженері Еламан Аубакиров:
– Шомылу маусымы басталмай жатып, біз қауіпсіздік шараларын барынша күшейттік. Халыққа түсіндіру жұмыстары тікелей рейдтік топтар арқылы жүргізіледі. Дронмен жағажайларды бақылап, ескерту жасаудың нәтижесі жақсы. Бұл – заман тала-бы, – деп дайындықты түсіндіріп өтті.
Шомылу мәдениетін қалыптастыруда балаларға ерекше көңіл бөлінуде. Тәртіп сақшылары мен еріктілер мектеп оқушыларына арнайы сабақтар өткізіп, 9 мыңға жуық бала қамтылған профилактикалық іс-шаралар жүргізген.
Табиғат аясы тынбай бақылауды қажет етеді. Биылдың өзінде Жетісуда екі ірі орман өрті тіркеліп, шығын көлемі 2 миллион теңгеден асты. Құрғақ шөп, бейберекет от жағу, ескерусіз қалдырылған темекі – өрттің басты себебі. Орман өрті жайлы мәселе табиғи ресурстар басқармасының ғана емес, бүкіл қоғамның ортақ мәселесі.
Облыстық табиғи ресурстар және табиғатты пайдалануды реттеу басқармасының орман шаруашылығы бөлімінің басшысы Шынар Мейрманова:
– Қазір орман алқаптарының 84 пайызға жуығы техникалық құралдармен қамтамасыз етілді. Жыл соңына дейін бұл көрсеткіш 96 пайызға жетеді деп жоспарлап отырмыз. Қосымша техника, мотоцикл, дрон, бейнебақылау жүйелері сатып алынуда. Біздің басты мақсат – өртті болдырмау, ол үшін халықпен тығыз байланыс қажет, – дейді.
Биыл 3328 шақырым минералданған жолаққа күтім жасау және 5 шақырым жаңасын салу жоспарланған. Қазірдің өзінде 118 шақырымы дайын. Бұл өрттің таралуына тосқауыл болар табиғи кедергі.
Жалынның салдарын сөндіру оңай емес, оны болдырмау – басты мақсат. Қазіргі таңда 3098 адам мен 500-ден астам техника өрт сөндіруге сақадай сай тұр. Еріктілер мен орманшылардан құралған 115 топ пен 49 бекет алқаптарды кезекпен бақылайды. Рейдтік топтар тікелей бақылауда. Тәртіп бұзғандарға ескерту де, айыппұл да қарастырылған.
Санжар СҰЛТАНҒАЗЫ
