Дүниежүзілік туризм күні қала күнімен тұспа-тұс келуіне орай «Visit Zhetysu» туристік ақпараттық орталығы ерекше шара ұйымдастырды. Мерекелік жиын Бикен Римова атындағы Талдықорған драма театрынан бастау алды.
Салтанатты шараға облыс әкімінің орынбасары Әсет Қанағатов, еліміздің әр өңірінен туризмді насихаттап жүрген журналистер, блогерлер мен сала мамандары қатысты. Жиында облыс әкімінің орынбасары сөз алып, шалқыған көлі, асқақ тауы, ну орманы, шалқар даласы мен салқар құмы араласқан Жетісу өңірінің табиғаты адамды баурап алатынын, киелі мекен туризмді дамытуға қолайлы өңір екенін айтты. Сонымен қатар, туризм саласының өркендеп келе жатқанын жеткізіп, облыста атқарылып жатқан жұмыстарды баяндады. Сөз соңында туризм саласының дамуына сүбелі үлесін қосқан мамандар мен киелі өңірімізді насихаттап жүрген БАҚ өкілдерін марапаттады.
Өз кезегінде «Жоңғар Алатауы» және «Алтын-Eмел» мемлекеттік Ұлттық табиғи парктерінің өкілдері сөз алып, туристер санының жыл санап артып келе жатқанын айтты.
Осыдан кейін «Visit Zhetysu» туристік ақпараттық орталығы әр өңірден келген журналистер мен блогерлерге баспасөз турын ұйымдастырып, Жетісудың жүрегі саналатын Талдықорған қаласының әсем жерлерін аралады. Баспасөз туры барысында қонақтар Жетісу өңірінің самал желі мен тұмса табиғаты адамды баурап алатынын, саф алтындай ауасы туристердің демалуына пайдалы екенін, тотыдай таранған, сұңқардай сыланған әсем қаланың көркіне көз тоймайтынын айтып, шаһарды аралау барысындағы әсерлерімен бөлісті. Баспасөз туры «Жастар» саябағында қала күніне орай өткен мерекелік концертпен жалғасты.
Айдар ҚАЛИЕВ
