Табиғаты көз тартар «Тау Жетісу» туристік кешенінде жаһанның үздік парапланшылары бас қосты. Ескелді ауданына қарасты Екпінді ауылының маңында орналасқан аймақта үш апта бойы (10-28 маусым) парапланнан Әлем кубогы өтеді. Жарысқа 30 елден 100-ден астам спортшы қатысады. Ал ел намысын електен өткен 7 саңлақ қорғайды. Әуе спортындағы ең беделді жарыстың Жетісу жерінде өтуі тегін емес.
Парапланшылардың жыл сайын Жетісуда жиналып, жарыс өткізуі дәстүрге айналғандай. Әр жарыс – бір тарих. Көптеген парапланшының шеберлігін байқап, айла-тәсілдеріне тәнтіміз. Биыл жанкүйерлер шара аясында «Pre – Srs / Kazakhstan Open» Халықаралық кубогы, дәлдікке қону бойынша параплан спортынан Педро Тирадо кубогы, дәлдікке қону бойынша параплан спортынан чемпиондар лигасының кубогы және параплан спорты бойынша Әлем кубогы және Азия турын тамашалай алады.
– Жетісу өңірінің бірегей таулы ландшафты мен қолайлы жағдайы параплан спортын дамытуға толықтай мүмкіндік береді. Әлемдік деңгейдегі кәсіби парапланшылар бұл аймақтың географиялық артықшылығын жоғары бағалап отыр. Біздің басты мақсатымыз – тек жеңімпаздарды анықтаумен шектелмей, Қазақстанның әуе спортындағы және халықаралық туризмдегі зор әлеуетін әлемдік қоғамдастыққа паш ету. Биылғы бәсекенің деңгейі де, қатысушылардың дайындығы да өте жоғары. Өз жерімізде ел намысын қорғайтын жеті спортшымыздың дайындығы тас-түйін және олардың халықаралық аренада лайықты өнер көрсететініне сенеміз, – дейді іс-шараның басты ұйымдастырушысы Давид Виршки.
Желдің бағытын бағындырған шеберлер тек биікте қалықтап қана қоймай, белгіленген жерге дәлдікпен қонудан бақ сынайды. Ауа райы әзірге парапланшылар үшін қолайлы.
Қали АСҚАР
