Сала басшыларының айтуынша, қазір Жетісу өңірінде 40-тан астам ірі су айдыны бар. Оның 4-і көл, 15-і өзен, 8-і су қоймасы, 16-сы әр түрлі тоғандар. Осыған сәйкес, аймақта қайғылы оқиғаларға қарсы әр түрлі алдын алу шаралар қабылданған. Мәселен, биыл 2500-ге жуық рейд жүргізіліп, халыққа 9500-ден астам қауіпсіздік ережелері бойынша жадынама таратылса, баспасөз құралдарында 300 жарияланым мен телеэфир ұйымдастырылған. Сондай-ақ, құтқарушылар балалар лагерлері мен демалыс аймақтары орналасқан 23 су айдынының түбін тексеріп тазарту жұмыстарын жүргізген.
Департаменттің баспасөз қызметінің мәліметінше, өткен жылы өңірде суға түсуден 5 адам қайтыс болса, биыл 4 адам ажал құшқан. Олардың 2-уі бала. Өкініштісі, орын алған оқыс оқиғалар шомылуға арналмаған аумақтарда болған. Сонымен қатар, биыл құтқарушылардың кәсіби және үйлесімді іс-қимылдарының арқасында суға батқан 36 азамат құтқарылса, оның ішінде 13 бала бар. Аталған мезгілде су айдындарындағы қауіпсіздік ережелерін сақтамағаны үшін 51 азамат әкімшілік жауапкершілікке тартылып, жалпы 746 мың теңге көлемінде айыппұл төлеу міндеттелсе, көліктік бақылау инспекциясымен шағын көлемді кемелерді пайдалану ережелерін бұзудың 208 дерегі анықталып, оларға 1,4 млн теңгеден астам айыппұл салынған.
– Бүгінде облыс әкімдігінің қаулысымен бекітілген өңірде 5 ресми шомылу орны, 76 тыйым салынған аумақ бар. Су айдындарындағы қайғылы оқиғалардың негізі шомылуға арналмаған жерлерде суға түсуден және алкогольдік ішімдік ішу мен балаларды бақылаусыз жіберуден туындауда. Сондықтан да азаматтарды жеке қауіпсіздікке жауапкершілікпен қарауға және демалыс үшін тек ресми рұқсат етілген жағажайларды таңдауға шақырамыз,– дейді құтқарушылар.
Айдын КӘЛІМХАН
