Жетісу облысының Ақсу ауданында қайғылы жағдай тіркелді: ер адам 30 жастағы әйелін ұрып өлтірді. Оқиға биылғы 22 маусым күні болғанын 7-su.kz ақпараттық порталы хабарлайды.
Марқұм Айзаттың туыстарының айтуынша, күйеуі әйелін соққыға жыққан соң оны әуелі ата-анасының үйіне апарып, кейін аудандық ауруханаға жеткізген. Алайда ол уақытта ауруханада жөндеу жұмыстары жүргізіліп жатқандықтан, зардап шегушіні Талдықорғанға апаруға тура келген. Өкінішке қарай, жас әйел жолда жан тәсілім етті.
– Оның мәйітін мәйітханадан ешбір ресми құжатсыз алып кеттік. Денесінің сау-тамтығы қалмаған. Бұл – тұрмыстық зорлық-зомбылықтың салдары, күйеуі әбден соққыға жыққан. Енді әділ тергеу жүргізіліп, кінәлі тиісті жазасын алса екен дейміз, – дейді марқұмның әпкесі.
Жетісу облыстық полиция департаменті күдіктінің ұсталғанын растады. Ведомствоның мәліметінше, аталған факті бойынша сотқа дейінгі тергеу басталған.
– Қазір сотқа дейінгі тергеу амалдары жүріп жатыр. Оқиғаның барлық мән-жайы анықталады. Тергеу мүддесіне орай қосымша ақпарат жарияланбайды, – деп хабарлады полиция.
Айзаттың артында екі жасар қызы қалды.
Тұрмыстық зорлық-зомбылық мәселесі қоғамда әлі де өзекті күйінде қалып отыр. Сарапшылардың пікірінше, мұндай қылмыстардың алдын алу үшін құқық қорғау органдарының да, қоғамның да жауапкершілігі күшейтілуі тиіс.
