Жетісу өңірінде тау туримін дамытуға бағытталған «Алатау аманаты» жобасы жалғасын табуда. Панфилов ауданында «Сарыбел» атты жаңа туристік маршрут ашылып, аймақтың туристік әлеуетін арттыруға тағы бір қадам жасалды.
Мемлекет басшысы Қасым-Жомарт Тоқаев өзінің Жолдауында және Жетісу облысына сапары барысында туризмнің ел экономикасы үшін стратегиялық маңызын атап өткен болатын. Президент атап өткендей, туризм – жасыл экономикаға көшу жолындағы негізгі бағыттардың бірі әрі шикізаттық өнімге балама ретінде ұлттық экономиканың өсуіне ықпал ететін сала.
Осы мақсатта «AMANAT» партиясы жүйелі түрде жүзеге асырып келе жатқан «Алатау аманаты» жобасы халықтың табиғат аясында белсенді демалысын ұйымдастыруға, экологиялық мәдениетті көтеруге және жаңа туристік бағыттарды дамытуға бағытталған.
Жетісу облыстық филиалының төрағасы Арыстанғали Арын бастаған жұмыс тобы Панфилов ауданында ашылған «Сарыбел» жаяу жүргіншілер бағытының тұсауын кесті. Ұзындығы 12 шақырымды құрайтын бұл маршрут табиғатпен етене танысуға мүмкіндік беріп, өңір тұрғындары мен қонақтарының сүйікті демалыс орнына айналуы тиіс.
– «Біздің мақсатымыз – Жетісудың бай табиғи мұрасын насихаттап қана қоймай, туризмді жаңа деңгейге көтеру. Сарыбел бағыты – осы істің бастауы ғана. Алдағы уақытта жобамыз барлық аудан-қалаларды қамтып, халықаралық деңгейге шығатынына сенімдіміз», – деді «AMANAT» партиясы Жетісу облыстық филиалының төрағасы Арыстанғали Арын.
Айта кетейік, жоба алғаш рет Іле-Алатау ұлттық табиғи паркінің аумағындағы Аюсай шатқалынан бастау алған болатын. Мәжіліс Спикері, «AMANAT» партиясының Төрағасы Ерлан Қошановтың бастамасымен қолға алынған «Алатау аманаты» жобасы Шарын шатқалынан Тамғалы-тас археологиялық кешеніне дейінгі 1200 шақырымдық ұлттық соқпақты қамтиды.
Бағыт бойында 20 елді мекен мен 24 туристік инфрақұрылым нысаны орналасқан. Туристер этноауылдарға, глэмпингтер мен кемпингтерге, визит-орталықтарға, құтқару стансаларына, сондай-ақ этномәдени және гастрономиялық туризм орындарына бару мүмкіндігіне ие болады.
«Алатау аманаты» жобасы – тек туризмді ғана емес, ауыл тұрғындарының экономикалық белсенділігін арттырып, ішкі және халықаралық туризмге арналған жаңа экожүйе қалыптастыруға бағытталған ауқымды бастама.
