Көктемнің алғашқы айы еліміз үшін үлкен саяси белеспен басталғалы тұр. 15 наурыз күні өтетін республикалық референдум әрбір қазақстандықтың таңдауы таразыға түсетін сәт. Дәл осы тұста сайлау процесінің әділдігі мен ашықтығына кепіл болатын азаматтық қоғамның рөлі ерекше байқалады. Осы жауапкершілікті өз мойнына алған «Халық үні» бақылаушылар тобының жұмысы қызу.
«Халық үні» тобының құрамына 50 адам іріктеліп алынған. Бұл өз елінің болашағына бей-жай қарамайтын, заң үстемдігін бірінші орынға қоятын еріктілер тобы. Олар референдум күні қаладағы дауыс беру учаскелеріне барып, таңсәріден кеш батқанға дейін әрбір бюллетеннің тағдырын, әрбір азаматтың құқығын қорғауды көздеп отыр.
Мұнда тек ниеттің болуы жеткіліксіз. Сондықтан да, қазіргі таңда бұл 50 бақылаушы арнайы дайындық мектебінен өтуде. Олар үшін күнделікті оқу-жаттығулар мен дайындықтар ұйымдастырылуда. Семинар залындағы қызу талқылаулар мен заң тармақтарын талдау барысынан-ақ бұл топтың сапалы қызмет көрсетуге қаншалықты мән беріп отырғанын аңғару қиын емес. Оларға дауыс беру барысында орын алуы мүмкін кез келген жағдайда қалай әрекет ету керектігі, заң бұзушылықтарды қалай тіркеу қажеттігі және бақылаушының әдеп кодексі жан-жақты түсіндірілуде.
Бақылаушылардың пайымынша, жақсы дайындалған маман ғана кәсіби деңгейде қызмет көрсете алады. Сондықтан бұл инструктаж олардың бойындағы сенімділікті нығайтып, референдумның абыроймен өтуіне жасалған нақты қадам.
15 наурыз күні Жетісу халқы өз таңдауын жасауға келгенде, оларды табалдырықтан «Халық үні» тобының өкілдері қарсы алады. 50 бақылаушының қырағы жанары мен терең дайындығы әділ шешімнің басты кепілі болмақ. Жетісу жұртшылығы ашық қоғам құру жолындағы маңызды емтиханға сақадай сай.
Бахтияр ЖАҚСЫКЕЛДИНОВ,
«Халық үні» бақылаушылар тобының
Талдықорған қаласы бойынша координаттары
