Нақтырақ айтсақ, Жетісу облысының тұрғыны Олжас Мақсатұлы өткен жылдың 22 мамырда мерзімді әскери қызметке шақырылған. Отан алдындағы борышын абыроймен атқарған ол биыл ҰБТ тапсырмай-ақ жоғары оқу орнының білім грантын иеленді.
Сала басшыларының сөзінше, «Срочник.2.0» бағдарламасы 2023 жылы іске қосылған. Бұл – әскери борышын өтеп жүрген сарбаздарға емтихан тапсырмай-ақ жоғары оқу орындарына түсуге мүмкіндік беретін мемлекеттік жоба. Алайда, бұл жеңілдікке қол жеткізу үшін үміткерлер төрт түрлі талап бойынша іріктеуден өтеді. Бағдарламаның басты артықшылығы – білімге қолжетімділікті арттыра отырып, жастардың ел қауіпсіздігі мен қорғанысына үлес қосуын қолдау. Жетісу облысынның тұрғыны Олжас Мақсатұлы осы бағдарлама арқылы білім грантын жеңіп алған өңірдегі алғашқы сарбаз.
– Мен бұл бағдарлама туралы өз қаламдағы Қорғаныс істері жөніндегі департаменттен білдім. Әскерге аттанар алдында бізге ақпараттық түсіндіру жұмыстары жүргізіліп, «Срочник 2.0» бағдарламасы туралы айтылды. Осыдан соң өзіме нақты мақсат қойдым. Барлық тапсырмалар мен нормативтерді жақсы орындауға тырыстым. Енді, міне, сол еңбегімнің жемісін көріп, жоғары оқу орнының грант иегері атанып отырмын. Бұл – мен үшін үлкен қуаныш, – дейді жас сарбаз.
Айдын КӘЛІМХАН
