«Жаркенттегі №74261 әскери бөлімінде офицердің мәйіті табылды» деп жазды журналист Диас Нұрақын өзінің әлеуметтік желідегі парақшасында.
Жетісу облысында тағыда әскер өлімі тіркелді. Офицер тапсырыспен өлтірілген болуы мүмкін.
Оқиға Жаркенттегі №74261 әскери бөлімінде болған.
«Офицердің мәйіті табылды. Инженерлік қызметтің басшысын қатардағы жауынгерлер ұстап алып, қол-аяғын байлап, айдалаға тастап кеткен. Ес-түссіз жатқан әскериді түнжарымда қаруластары тауып алыпты. Жедел-жәрдем шақыртқанымен Дәулет Нұрланұлын ажалдан арашалап қалу мүмкін болмады»,- деп жазды журналист.
Ал, марқұмды ұстап, қол-аяғын байлап тастау туралы бұйрықты үш жауынгерге барлау-шабуылдау бригадасының командирі берді деген ақпарат бар.
«Әскердегі бұл оқыс жағдайды жуып-шаюға тырысып жатқан сияқты. Себебі капитан Дәулет Нұрланұлы диверсиялық топтарға қарсы жоспардан тыс оқу-жаттығу кезінде көз жұмды деген мәлімет таралуда. Бұл қасақана кісі өлтіру ме, әлде абайсызда болған қылмыс па оны тергеушілер анықтауы тиіс», — деді Диас Нұрақын.
Фото ©️ Tengrinews.kz / Турар Казангапов
