Ауыр жүк көліктері тасжолдардың тез тозуына, асфальт сапасына және ең бастысы – жол қауіпсіздігіне айтарлықтай әсер етеді. Сондықтан олардың қозғалысын қадағалау, салмақты бақылау жүйесін енгізу – бүгінде өзекті мәселелердің бірі болып отыр.
Республикалық маңызы бар автомобиль жолдарының қауіпсіздігін қамтамасыз ету мақсатында «ҚазАвтоЖол» ұлттық компаниясы» АҚ биыл 28 автоматтандырылған өлшеу стансысын орнатуды жоспарлаған болатын. Оның 13-і жолдарды қайта жаңарту барысында, 13-і орташа жөндеу кезінде, ал екеуі күрделі жөндеу аясында іске қосылады.
Жалпы 2026 жылдың соңына дейін республика бойынша 220 АӨС орнату көзделген. Соның ішінде 126 бекет республикалық маңызы бар тасжолдарға қойылады.
Жетісу облысында да осындай бақылау бекеттері орнатылып жатыр. Қазіргі таңда аймақта 6 АӨС жұмыс істеп тұр. Олардың үшеуі Алматы-Қорғас (2019 жылы), екеуі Алматы-Өскемен (2025 жылы), біреуі Сарыөзек-Көктал (2025 жылы) тасжолдарының бойына орнатылып, пайдалануға берілді.
– Бұл жүйенің артықшылығы – ауыр жүк көліктерінің қозғалысын қашықтан бақылап, жолдардың сақталуын қамтамасыз етуге мүмкіндік береді. Автоматтандырылған стансылардың арқасында артық салмақпен жүрген көліктерді дер кезінде тоқтатуға болады. Алайда, кейде жүргізушілер тарапынан қарсылықтар туындап жатады. Олар қосымша уақыт жоғалтамыз немесе айыппұл көлемі жоғары деп сын айтады. Бірақ түптеп келгенде, бұл шара жолдардың ұзақ сақталуы мен адамдардың қауіпсіздігі үшін жасалып отырғанын түсіну керек, – дейді «ҚазАвтоЖол» ҰК» АҚ «Ақылы автомобиль жолдары дирекциясы» филиалының өкілі Бағытжан Болатұлы.
Айта кетерлігі, АӨС негізінен көлік қозғалысы қарқынды учаскелерге қойылады. Жергілікті жолдарға мұндай бекеттердің орнатылуына жергілікті атқарушы органдар жауапты.
Қажет АНДАС
