Күреңбелдіктер биыл 100 мың гектарға жуық алқапқа егін егеді. Бүгінде олар ауа райының құбылмалылығына қарамастан көктемгі науқанды қыздырып жатыр.
Кербұлақ ауданындағы ірі шаруашылықтардың бірі осы маусымда астық егу жұмысын жаңа сепкіштермен жүргізуде. Төрт трактор бір күнде орта есеппен 150 гектар егістік жерге егін егеді. Тәжірибелі механизатор Бақтияр Құдайбергенов егістіктерде мұндай тиімді жұмысты біраз жыл көрмегенін айтады.
– Жаңа техникамен жұмыс істеу үлкен ләззат. Бәрі цифрландырылған, компьютер тұқымның тереңдігін, себу тығыздығын есептейді. Ал қондырманың өзі бірнеше істі атқарады. Осының арқасында біз бір уақытта барлық егу және өсіру жұмыстарын жүргіземіз, – дейді механизатор.
Бұл өңірдің климаты құрғақ. Сондықтан фермерлер мұнда күздік және жаздық бидай, уыт үшін арпа, қара бидай мен жүгері өсіруді жөн көреді. Басқа да ауылшаруашылығы дақылдарын егу үшін инновациялық технологиялар тәжірибеде жиі қолданылады. Олар егістікті тамшылатып және жаңбырлатып суару әдісін пайдаланып, техниканы лизингке алады. Биыл оны сатып алуға 90-нан аса өтінім келіп түскен.
Кербұлақ ауданы әкімінің орынбасары Жанат Жүнісбековтың айтуынша, осы жазда фрегаттармен 1500 гектар ауылшаруашылығы дақылдары суарылмақ. Сонымен бірге ауданда суару желілерін қайта құру бойынша жобаны іске асыру басталады. Қазір 134 шақырым суару жүйесін күрделі жөндеу бойынша жобалау-сметалық құжаттама дайындалуда. Барлық жұмыс жүргізілгеннен кейін 12 мың гектар егістік жер сумен қамтылатын болады.
Айта кетейік, осы маусымда Жетісуда дәнді дақылдарға 226 мың гектарға жуық ауылшаруашылығы алқабы бөлінді. Қазір олардың басым бөлігі егілді.
Айгүл БАЙБОСЫНОВА
