Облыстық әкімдікте кәмелетке толмағандардың істері және олардың құқықтарын қорғау жөніндегі комиссия отырысы өтті. Жиынға облыс әкімінің орынбасары Рустам Әли қатысты. Басқосуда жазғы демалыс маусымы мен бала қауіпсіздігі мәселесі қаралды.
Жетісу облысында жыл басынан бері жасөспірімдер жасаған қылмыс 69 пайызға төмендеген. Десе де балалар арасында жасалатын қылмыс түрлері әлі де азаймады. Мамандардың айтуынша, жасөспірімдердің қылмысқа баруына бірден-бір себеп – бос уақыттың көптігі. Сондықтан, құқықбұзушылықтың алдын алу үшін бірқатар шаралар қабылдау керек. Мәселен, облыста жазғы демалыс маусымында арнайы 9 лагерь жұмыс істейді. «Оқушыларды демалыс лагерьлеріне жіберіп, демалысын көңілді өткізу керек», – дейді мамандар.
– Кеңістіктерді жөндеп, арт спорт арқылы секцияларды ұйымдастыру керек. Келесі бір мәселе, табиғаты керемет Көктөбе ауылы сияқты жерге жаздық лагерь ұйымдастыру қажет. Қаражат бөлінді, мүмкіншілік бар. Соны сапалы игеруіміз керек, – деді облыс әкімінің орынбасары.
Осыдан кейін облыстық ТЖД бастығының орынбасары Игорь Жуков: «Бүгінгі отырыста балалардың қауіпсіздігі мәселесі қаралды. Өздеріңіз білетіндей, облыс аумағында аптап ыстық ерте басталды. Осы сәтті пайдалана отырып, ата-аналарға балалардың қауіпсіздігіне назар аударуын сұраймыз. Алкагольді сусындар бар жерде балаларды жалғыз қалдырмаңыздар. Тексерілген демалыс орнына ғана баруларыңызды сұраймыз», – деді.
Жиында бала қауіпсіздігіне ден қою керектігі айтылды. Осыған сәйкес төтенше жағдайлар департаменті білім ошақтары мен қоғамдық орындарда сақтық шараларын ұйымдастыруда. Нәтижесінде 265 мекеме тексеріліп, 3000-нан аса қауіпсіздік талабы бұзылғаны анықталды.
Айта кетейік, 2 маусымнан бастап, балалардың жазғы демалысы үшін арнайы оқу-сауықтыру орталықтары жұмысын бастады. Бүгінде 200 бала Текелі қаласында, 45 оқушы республикалық орталықта демалуда. Олардың қауіпсіздігі үшін арнайы мамандар бекітілген. Жалпы, биыл 103 мыңнан аса бала жазғы демалысын түрлі орталықтарда өткізеді.
Айдар Қалиев
