«Құлақтан кіріп бойды алар, жақсы ән мен тәтті күй. Көңілге түрлі ой салар, әнді сүйсең менше сүй!» – дейді хакім Абай. Осы тұста жаны жырға құмар жастардың елімізде қатары көбейіп келе жатқанын айта кеткен жөн. Өнерлі оқушылар жыл көлемінде ән салып сынға түспек.
Елімізде алғаш рет Халықаралық балаларды қорғау күніне арналған қазақ тіліндегі әндерден «Әншуақ» балалар фестивалі өтуде. Бұл өскелең ұрпақтың мәдени өміріндегі бірегей оқиға десек қателеспейміз. Шарапатты шара ҚР Оқу-ағарту министрлігінің қолдауымен ұйымдастырылып отыр.
Өнерлілер додасы 9 қыркүйектен басталды. Оған облыстағы жалпы білім беру мекемелері мен қосымша білім беру мекемелерінде білім алып жатқан оқушылар қатысу мүмкіндігіне ие. Балалар әндерінің челленджінде 6-18 жас аралығындағы солистер, дуэттер, трио, квартеттер, хор ұжымдары өнер көрсете алады. Ол үшін #ӘНШУАҚ жалпы хэштегінің астында TikTok әлеуметтік желісінде балалар әндерінің тікелей орындалуының бейнесін орналастыру қажет. Қорытындысы келер жылдың 1 маусым күні Халықаралық балаларды қорғау күнінде шығарылады.
Бұл күні еліміздің әрбір елді мекенінде «Open Air» форматында концерттер, ал елорданың өзінде «Әншуақ» фестивалінің гала-концерті өтеді. Гала-концерттің барлық қатысушылары дипломдармен, бағалы сыйлықтармен және «Балдәурен» республикалық оқу-сауықтыру орталығына жіберілетін жолдамалармен марапатталады.
Айта кетейік, шараның басты мақсаты – халқымыздың ұлттық құндылығы мен рухани мәдениетін дәріптеу. Есті әндердің иірімдерін жас буынның жадында жаңғырту.
–Фестивальдің бірегейлігі – ол еліміздің рухани байлығының парағы және ең бастысы, өскелең ұрпақтың бойына дәстүрлі тарихи, рухани рух негізінде орнықты адамгершілік сенімдерді сіңіру, – дейді шара ұйымдастырушылары.
Сабит ТОЛЫБЕКОВ,
Жетісу облысы білім басқармасының Дене тәрбиесі,
спорт, алғашқы әскери дайындығы және
қосымша білім берудің ғылыми-тәжірибелік
орталығы көркем эстетикалық шығармашылықты дамыту
бөлімінің әдіскері
