Мемлекет басшысы Қасым-Жомарт Тоқаев «Turkistan» газетіне берген сұхбатында еліміздің алдағы даму бағыты мен күтіліп отырған маңызды оқиғаларды жариялады, – деп хабарлайды 7-su.kz ақпараттық порталы.
Президент 2026 жылды «Цифрландыру және жасанды интеллект жылы» деп жариялады. Бұл – Қазақстан үшін жай ғана технологиялық жаңару емес, экономиканы ілгерілететін тарихи мүмкіндік. Жасанды интеллект мемлекеттік басқару, білім беру және денсаулық сақтау салаларына серпін беріп, жұмыс тиімділігін арттырмақ.
Саяси салада да ірі өзгерістер орын алмақ. Биыл ел тағдырын айқындайтын конституциялық реформа бойынша референдум өтеді.
«Жоспарланған өзгерістер өте көп, бәрі тұтаса келгенде жаңа Конституция қабылдаумен пара-пар қадам жасаймыз», – деді Қасым-Жомарт Тоқаев.
Қазіргі уақытта сарапшылар тобы Ата заңның жаңа редакциясына қатысты ұсыныстарды мұқият қарап жатыр.
Биыл еліміз Тәуелсіздіктің 35 жылдық мерейтойын атап өтеді. Мемлекет басшысы бұл датаны даңғазалықпен емес, болашаққа жоспар құрумен өткізу керектігін айтты. Осы орайда «Таза Қазақстан» акциясы тек табиғатты қорғау емес, ұлттық болмысты тазартудың идеологиялық құралына айналмақ. БҰҰ тарапынан 2026 жылдың «Халықаралық еріктілер жылы» деп жариялануы осы бастамамен үндесіп отыр.
Президент қоғамның бет-бейнесі түбегейлі өзгеретінін, әсіресе жастардың жаңа технологиялар мен білім-ғылым жолындағы асуларды бағындыратынына сенім білдірді. 2026 жыл Қазақстанның ұзақ жылдарға арналған бағыт-бағдарын айқындайтын шешуші кезең болмақ.
