«Нұр Отан» партиясының Талдықорған қалалық филиалы «Мектепке жол» республикалық қайырымдылық акциясына белсене қатысып, 78 жеткіншектің жаңа оқу жылына толық дайындықпен баруына игі ықпал етті. Сондай игілікті іс-шараның бірі партия ғимаратында өтіп, «Тұрғынүйқұрылысжинақбанк» облыстық филиалы директорының орынбасары Қуандық Нұрғалиев көпбалалы Погорилый отбасының жеткіншегіне мектеп формасы мен оқуға қажетті құрал-жабдықтар тарту етті.
Н. Островский атындағы №8 орта мектебінің 4-сыныбында оқитын қызы Альбинаны жетелей келген Александр Погорилый жалғыз өзі жеті бала тәрбиелеп отырған әке. Баласының 6-уы мектеп қабырғасында оқыса, кенжесі 5 жаста. Төрт жыл бұрын балалардың анасы перзенттерінен бас тартып, әкелерінің қамқорлығына тастап кеткен. Александр Погорилый балаларын ешкімнен кем етіп өсірмеуге тырысып бағуда.
– Бізден де тұрмысы нашар, мұқтаж отбасы баршылық. Солар көмекке көбірек зәру ғой деп ойлаймын. Десек те, бірнеше баланы бір мезгілде мектепке толық дайындау оңай емес. Осыны ескерген партия филиалы көпбалалы отбасы ретінде көмек жасауды ұйғарыпты. Партия филиалына да, демеушілік жасап отырған «Тұрғынүйқұрылысжинақбанкінің» қызметкерлеріне де алғысым шексіз. Қолымнан келгенше балаларымның қиындығын өзім көтеріп, жәутеңдетпей өсіруге тырысамын, – деді қамқор әке.
Балаларына барынша шуағын төгіп, кейбір аналардың өзі бере алмайтын жылу мен мейірімді сыйлап отырған әкеге банк қызметкерлері кішігірім сый жасап, мерейін асыра түсті.
– Әдетте акция аясында балаларға ғана тарту жасалып жатады, ал ата-анаға да қоса сыйлық беру бірінші рет орын алып отырған жайт, – деп атап өтті бұл қуанышты сәттің басы-қасында жүрген қалалық партия филиалының кеңесшісі Элеонора Талданбаева.
Жалпы «Тұрғынүйқұрылысжинақбанк» жыл сайын акцияға үлес қосып, демеушілік көрсетіп келеді. Бұл ретте «Айналайын» балалар үйінің тәрбиеленушісі Мерқали Сағынышқа өткен жылы есепшот ашылып, 160 мыңға сертификат табысталғанын, жыл сайын банк қызметкерлері бір күндік жалақысын сонда аударып отыратынын атап өткен жөн. Ол жасөспірімнің болашақта мемлекеттік бағдарлама бойынша жеңілдікпен үй алуына мүмкіндік ашады.
Қалалық партия филиалының да ұйытқы болуымен осындай жарқын бастама жүзеге асырылып, жетім және ата-ана қарауынсыз қалған 25 балаға депозиттік есепшот ашылып, оған 1 302 191 теңге көлемінде салым салынған.
Балалардың болашағы үшін жасалып жатқан қандай іс болсын құптауға тұрарлық. «Ізгілікті істен із қалар» демекші, жақсылықтың шарапаты талай жанға шуақ шашып, жүректерін жылыта түсері анық.
Алма ЕСЕНБАЕВА
