ҚР Конституциясы күні қарсаңында Алакөл ауданы, Үшарал қаласында 60 пәтерлі көпқабатты тұрғын үйдің кілті тұрғын үй кезегінде тұрған аудан азаматтарына табысталды.
Заманауи үлгіде бой көтерген баспананы аудандық құрылыс, сәулет және қала құрылысы бөлімінің тапсырысы негізінде мердігер «Қайнар АКБ» ЖШС-гі құрылыс жұмыстарын сапалы жүргізді.
Жалпы, аудан бойынша тұрғын үй кезегінде 4 санат бойынша 1653 азамат тіркелген. 5 қабаттан тұратын 60 пәтерлі жалдамалы тұрғын үйдің(оның ішінде, бір бөлмелі-30, екі бөлмелі-15, үш бөлмелі-15 пәтер бар) кілті 60 отбасыға табысталды.
Баспаналы болу бақытына ие болған аудан тұрғыны, көпбалалы ана Гульяим Шакенова: «Тұрғын үй кезегінде тұрғаныма 5 жылдан астам уақыт болды. 5 баламмен сапасы нашарлау жалдамалы үйлерде тұрып келдік. Міне, бүгін тұрғын үй кезегімен өзіміздің жеке жаңа, заманауи тұрғын үйдің кілтін иеленіп жатырмыз. Қуанышымызда шек жоқ. Барша жаңа қоныс иелерін құттықтаймын. Ауданымыз дами берсін!» -, деп ризашылығын жеткізді.
Қоныс тойын тойлап жатқан тұрғындардың арасында отбасылық өмірге жаңа аяқ басқандар да, зейнет жастағы қарияларда бар. Ендігі мақсат пәтер ішін толтырып, тәуелсіз елде бейбіт күн кешу дейді олар.
Пәтер кілттеріне ие болғандардың басым бөлігі – әлеуметтік жағынан аз қамтылған және жылдар бойы пәтер кезегінде тұрған отбасылар. Жыл санап дамып келе жатқан Алакөл ауданындағы тұрғын үй мәселесі оң тұрғыда шешіліп келеді.
Айта кетейік, аудан халқының әлеуметтік ахуалын жақсарту, тұрғын үймен қамтамасыз ету мақсатында тұрғын үй кезегінде тұрған халықтың әлеуметтік осал топтарындағы аудан тұрғындарына 60 үй және Қабанбай ауылында жас мамандарға арналған 10 жеке тұрғын үйдің құрылыс жұмыстары басталып, жыл соңына дейін қолданысқа беру жоспарлануда. Осылайша өңірде қоныс тойын тойлаушылар саны артпақ.
Отбасыларды тұрғын үймен қолдаудың кешенді моделі әлі де жалғасатын болады.
