Кітапхана – білім мен мәдениеттің сақтаушысы, өткен мен қазіргі заманның арасындағы байланысты нығайтып, ұрпақ сабақтастығын жалғаушы орын. Бұл жай ғана кітаптар мен қолжазбаларды сақтайтын ғимарат емес, адамның ақыл-ойының өркендеуіне жол ашатын, оның рухани дамуына, санасының кеңеюіне ықпал ететін ғажайып кеңістік.
Әрбір кітапхана өз халқының мәдениеті мен тарихының құнды айнасы, ал әрбір кітап сол тарихтың бір бөлшегі, білімнің, өнердің, ақиқаттың кілті. Көне туындылар мен қолжазбалар арқылы ел тарихын, мәдениетін және ғылымын білуге болады. Әсіресе сирек кітаптар өткен дәуірдің ойлау жүйесі, әлеуметтік құрылымдары, әдеби үрдістері мен саяси оқиғалары туралы құнды ақпарат береді.
Қазіргі уақытта әрбір өңірдегі кітапханалар қоғамның интеллектуалдық және мәдени дамуына маңызды үлес қосуда. Солардың бірі – облыстық Сәкен Сейфуллин атындағы орталық кітапхана. Бұл мекеме өзінің сирек басылымдар қорының байлығымен ерекшеленеді. Оның қорында 85 дана орыс және көне славян тілдерінде бірегей құнды кітаптар бар.
Қор 1887-1941 жылдар аралығындағы анықтамалық және ХІХ ғасырдың тарихы мен әдебиеті және құнды мағлұмат беретін басылымдармен қамтылған. Атап айтсақ, қорындағы ең көне басылым Мэй Лев Александровичтің 1887 жылғы «Толық шығармалар жинағы», көп томдық «Энциклопедиялық сөздіктер», 1927-1934 жылдары жарық көрген «Техникалық энциклопедия» анықтамалық сериясы. Сондай-ақ, XIX ғасырдың басында басылған көркем әдебиет жазушылары Г. Гауптман, Г. Гейненің «Толық шығармалар» жинағы, Г. Данилевскийдің 24 томдық, Л. Дейчтің «Жарты ғасыр ішінде», «ХІХ ғасырдың тарихы» атты 6 томдық шығармаларымен қамтылған.
Көптеген жаңашылдық пен цифрлық ресурстар өмірімізді өзгертсе де кітаптар бұрынғыдай білімнің қайнар көзі болып қала бермек. Бірақ, кітапханалардағы сирек кездесетін туындылар біздің мәдени және ғылыми мұрамыздың ажырамас бөлігі.
Алтын қордан орын алған сирек кітаптар мұрағаты тек өткеннің баға жетпес куәгері ғана емес, ғасырлар мен ұрпақтар арасындағы рухани байланыстың алтын көпірі іспеттес.
Бақытгүл ҚАСЕНОВА,
облыстық С. Сейфуллин атындағы орталық кітапхананың негізгі қорды сақтау бөлімінің кітапханашысы
Талдықорған қаласы
