Күннің күрт жылынуына байланысты қыс бойы жатқан қалың қардың іргесі сетінеп, ауыл-ауылдарды су басу қаупі туындады. Әсіресе, таулы аймақтарда орналасқан бірнеше елді мекен тұрғындары аулаларын қар суынан тазарта алмай әлек. Осыған байланысты Жамбыл ауданында төтенше жағдай жарияланды. Су тасқыны тау баурайындағы Еңбекшіқазақ, Талғар, Қарасай аудандарында да тіркеліп, кейбір тұрғындар қауіпсіз жерге көшірілген. Облыс әкімі Амандық БАТАЛОВ төтенше жағдайға байланысты кеше Алматымен көршілес жатқан аудандарды аралап, су тасқынынан зардап шегіп отырған ел-жұртпен кездесті.
Алдымен Талғар ауданына ат басын тіреген облыс басшысы Тұздыбастау ауылын аралап көріп, қауіптің алдын алу шараларымен танысты. Талғар ауданында Тұздыбастау, Бесағаш, Панфилов, Қызылту елді мекендерінде бірнеше ауланы су басқан. Тіпті, Тұздыбастау ауылының 1000 тұрғыны қауіпсіз аймаққа көшірілген. Суды сыртқа шығару жұмыстарын көрген облыс әкімі аудан басшыларына төтенше жағдайды алдын алуға байланысты сын-ескертпе айтып, арнайы тапсырма берді.
– Аулаларын су басқан ауылдарда әлі де адам күші мен техника жеткіліксіз болып отыр. Қосымша адам мен техника күшін тартуымыз керек, – деді Амандық Баталов.
Бұдан кейін облыс басшысы Алматының батысындағы Қарасай ауданына келді. Бұл ауданда 82 су басу дерегі тіркелген. Әсіресе, Қырғауылды, Батан, Қаскелең елді мекендерінде бірнеше үйдің ауласын су алып қалған. Облыс әкімі Қаскелең қаласы мен Қырғауылды ауылындағы қауіпке қарсы әрекет ету жұмыстарымен танысты. Сондай-ақ, қар суынан зардап шегіп отырған тұрғындармен кездесіп, келтірілген шығын есептелетінін айтты. Әкіммен тілдескен ел-жұрт айтып келмейтін апатқа бірігіп қана қарсы тұра алатынын алға тартты. «Еш абыржымаңыздар. Ең бірінші мезетте судың бетін қайтарамыз. Одан кейін судан келген шығынды анықтаймыз», – деді Амандық Ғаббасұлы.
Қазіргі таңда Жамбыл ауданындағы жағдай тұрақталды. Ұзынағаш, Қайназар елді мекендерінде су тасқынын алдын алу шаралары жүргізілді. Төтенше жағдай департаменті өкілдері, ҚР Ұлттық Ұлан сарбаздары су басқан ауылдарда табиғи қауіптің бетін қайтарып, жұмыла еңбек етуде. Облыс әкімінің баспасөз қызметі ұсынған деректерге сүйенсек, төтенше жағдай жарияланған ауылдарға қосымша техника күштері тартылған. «Бірінші кезекте үй аулаларындағы суды сыртқа тасымалдау жұмыстары қолға алынды. Сонымен бірге, уақытша су құбырлары салынып жатыр. Бұл құбырлар ауылдағы суды далалы жерге тасымалдауға арналған», – дейді облыс әкімінің баспасөз хатшысы Ғалымұрат Жүкел.
Үш ауданды аралаған облыс басшысы: «Облыстық комиссия апаттан зардап шеккен үйлердің шығын көлемін анықтайды. Таудағы қар әлі толық ерімегендіктен қосымша құбырлар салынып, алдын алу шаралары жүргізілуде. Бүгінде қауіп жоқ. Бақылау күшейтілді», – деді. Еске салсақ, кеше Жамбыл ауданында екі ауылдың тұрғындары су тасқынына тап болды. 120 ауланы су басқан еді.
Қуаныш ТҰНҒАТАР
