Күн санап құлпыра түскен Талдықорғанның көркіне көрік қосқан тағы бір демалыс орны ашылды. Осыдан біраз бұрын ғана «Жастар» саябағы жасалып, «әуенмен билейтін субұрқағымен» тұрғындарды таңғалдырған еді. Енді, міне, Қараталдың жағалауы көрген адам көркіне көзтоймастай етіп жасанды.
Жаңа демалыс аллеясын заманауи жаңа сәулеттік кешен, Жетісудың көрнекті демалыс орындарының бірі деуге болады. Жағалау алаңына келушілер тынығып отыратын орындықтар қойылып, кішкентай балаларға арналған әткеншектер, белсенді демалысты жақсы көретіндер үшін скейт пен роллердром ойын алаңдары, велосипед жолы жасалған.
Аллеяның ашылуына арнайы қатысқан облыс әкімі Амандық Баталов талдықорғандықтардың тынығып, демалуына арналған орынды аралап, тұрғындармен тілдесті. Мұндағы түрлі әткеншектерді тамашалай ойын қызығына батқан балалармен суретке түсіп, велосипедпен жарысқан жеткіншектерге өз сыйлықтарын да тарту етті. «Талдықорған: кеше, бүгін» атты фотокөрмеге айрықша назар аударып, қаланың қазіргі көрінісіне көз тояттатты. Жетісулықтарды тамаша аллеяның ашылуымен құттықтап, Елбасының халық үшін барлық жағдайды жасау керек деген тапсырмасы бойынша осынау әсем орынның бой көтеруіне мүмкіндік ашылып отырғанын, бұл еліміздің бас қаласы Астанаға қарап бой түзеп, Қаратал да Есіл өзеніндей көпшілік тынығып, демалатын орынға айналса деген ізгі ниеттен туындаған бастама екендігін атап өтті. Бұл жер үлкендер серуен құрып, жастар бір-бірімен танысып, салауатты өмір салтына ден қойып, балалар асыр салып ойнап, мәз-мейрам болатын орынға айналса деген тілегін де жеткізіп, демалыс аллеясының шамын жақты. Самаладай жарқыраған шамдармен қатар отшашулар шашылды.
Бұдан соң қалалықтар үшін танымал әншілер Мәдина Сәдуақасова, «Ринго» тобы, сонымен қатар «Алатау әуендері», «Үшқоңыр» ансамблі өнерпаздарының тарту етуімен концерттік бағдарлама ұсынылды. Халық аспаптары оркестрі мен «Биг-Бенд» ансамблінің орындауындағы шығармалар қалықтады. Танымал цирк әртісі Мұрат Мұтырғанов қаланың кішкентай тұрғындарының көңілін көтерді.
Демалыс аллеясының ашылуына орай көркемөнер галереясы суретшілер мен қолөнер шеберлерінің туындыларынан көрме ұйымдастырса, жас жеткіншектер шахмат, дойбы, асық ойындарын ойнап жарысты, арқан тартысып, күш сынасты.
Жағалау бойындағы орындықтарда отырып әсем көріністі тамашалаған көпшілік көркемдігімен көз тартар гүлзарлар мен ағаштарды, сәулеттік мүсіндерді тамашалады. Бір-бірімен тамаша үйлесім тапқан әсемдікке қызыға қарап, өзен жағалауынан ескен саф самалдың кереметін сезінді.
Алма ЕСЕНБАЕВА
