Халқымызда «Жаны саудың – тәні сау» деген сөз бар. Расында келешек ұрпақтың жарқын болашағының кепілі – денсаулық. Ақ желеңді абзал жан үшін аурудың алдын алып, кәсіби көмек көрсету – парыз. Десек те «Ауырып ем іздегенше, ауырмайтын жол ізде» деген сөзді ұрпақтың санасына сіңіріп, денсаулығына жауапкершілікпен қарауды қалыптастыру қажет.
Кеселді ағзаға жолатпау әр адамның өз қолында. Денсаулықты күту жеке бастың гигиенасынан басталады. Тазалық сақтап, дұрыс тамақтанып, денені күтіп ұстауға барынша көңіл бөлу керек. «Ас – адамның арқауы» дегендей, дұрыс тамақтанудың маңызы зор. Адам денсаулығына әсер ететін әлеуметтік факторлардың 50 пайызы тамақтануға байланысты. Кез келген ауруды емдеу үшін асқазан жолдарын ретке келтіру керек. Сондықтан тамақтану ережесін сақтай отырып, адам ағзасына қажетті, пайдалы элементтерден тұратын тағамдарды қолданған жөн. Ол үшін күн сайын жейтін астың құрамы ақуыз, май және көмірсулардан тұрғаны жөн.
Қазіргі таңда жастардың арасында темекі, ішімдік, нашақорлық өршіп тұр. Осындай індеттерден арылу қоғамдағы көкейкесті мәселелердің біріне айналды. Жастарымыздың мықты азамат болып өсуі үшін спортпен шұғылданудың маңызы зор. Спортпен жүйелі айналысқан адамның бұлшық еті қатайып, тыныс алу мүшелері жақсы дамып, иммунитеті нығаяды. Сонымен қатар, шыдамдылық, ептілік сияқты қасиеттері қалыптасады. Спорт адамның ақыл-ойының дамуына оң әсер етеді. Мемлекетіміздің басты құндылығы – адам. Сондықтан жастардың ұраны салауатты өмір салтын ұстану болу керек. Дені сау ұрпақ – дені сау ұлт. Азаматтарының ақыл-ойы келісті, денсаулығы мықты елдің болашағы зор болмақ.
Айгүл МҰРАТБЕКОВА,
облыстық аурухананың
реанимация бөлімінің
анестезист-мейірбикесі
