Кеше Бастөбе тауының етегіндегі «Қазақ халқына мың алғыс» атты монумент алдында алғыс айту мерекесі тойланды. Осынау айшықты шараны Қаратал жерін құтты қонысы еткен түрлі ұлт пен ұлыс өкілдері мерекелеп, ынтымақ пен бірлікте атап өтті.
Іс-шара шымылдығы «Қазақ халқына мың алғыс» монументіне гүл шоқтарын қоюмен ашылды. Үрмелі аспаптардың сүйемелдеуімен еліміздің Гимні шырқалғанда бір атаның баласындай болып кеткен тұрғындар жүрек тұсына қолын қойып, ортақ Отан алдындағы борышын сезінгендей күй кешті. Аудан әкімі Қайрат Бисембаев көпшілікті мерекемен құттықтады.
– Құрметті қонақтар, жерлестер! Сіздерді Алғыс айту күні мерекесімен шын жүректен құттықтаймын! Қазақстан халқы биыл екінші жыл Алғыс айту күнін атап өтіп отыр. Бұл мереке «Мәңгілік Ел» жалпыұлттық патриоттық идеясының, қазақстандық бірегейлік пен ел бірлігін ортақ тарих және ортақ тарихи сана негізінде нығайту мен дамытудың мән-мәтінінде қазақстандық құндылықтарды бейнелейді, – деді аудан әкімі. Алматы облыстық Қазақстан халқы Ассамблеясы төрағасының орынбасары, хатшылық меңгерушісі Ғабит Тұрсынбай өз сөзінде бұл мереке тағдыр тәлкегімен Қазақстан жеріне еріксіз қоныс аударған түрлі этностардың құтты қонысына айналған қасиетті қазақ жері мен қонақжай қазақ халқына терең тағзым белгісі екенін айта келе, Елбасының басшылығымен Тәуелсіз Қазақстан жолында аянбай тер төккен еліміздің барлық азаматтарының бір-біріне құрмет білдіретін күні екенін әңгімеледі. Ол облыс әкімі Амандық Баталовтың құттықтауын жеткізіп, елімізде, Жетісу жерінде бір-бірімен тонның ішкі бауындай араласып, тату-тәтті өмір сүріп жатқан ұлттар достығын тілге тиек етті.
Әсіресе, Алматы облысының Құрметті азаматы, «Ұлағат» ақсақалдар кеңесінің мүшесі Светлана Гаитова, Қазақстан халқы Ассамблеясы жанындағы жетекші журналистер клубының төрағасы, «Огни Алатау» газетінің бас редакторы Атсалим Идиговтың қазақ халқының мейірбандығы мен қайырымдылығы турасындағы жалынды сөздері жүрек тебірентті.
Сондай-ақ, Алматы облысының Құрметті азаматы Оралбек Жақиянов, Бастөбе ауылдық округі әкімдігінің бас маманы, кәріс ұлтының өкілі Ирина Керимова Қазақстанның босағасын берік, шаңырағын биік ұстап, түтінін түзу ұшыру – елдік мақсат екенін жеткізді.
Жиын соңында еркін елдің ұландары аштық пен репрессия, бейбітшілік пен татулық жайында әдеби-сазды монтаж көрсетті. Осылайша, 43 ұлт пен ұлыс өкілдері тұратын Қаратал жұрты Алғыс айту күнін айрықша атап өтті.
Асхат Өмірбаев.
Қаратал ауданы.
