Бейсен Құранбек атындағы Журналистер үйінде Ақсу ауданының әкімімен баспасөз конференциясы өтті. Ақсу ауданында 17 ауылдық округ, 49 елді мекен бар. Аудан аумағы 12,6 мың шақырым. Халық саны 36 565 адамды құрайды. Аудан әкімі Берік Тынышбаев ауданның әлеуметтік-экономикалық жағдайына тоқталды.
Әкімнің сөзінше, соңғы 10 айда ауылшаруашылығы өнімінің көлемі 28 млрд. 042 млн. теңгені құраған. Көктемде ауылшаруашылығы дақылдары 62,4 мың гектарға себілген еді. Оның 25,3 мыңы – суармалы егістік. Ақсу ауданының ежелден келе жатқан төл дақылы – қант қызылшасы. Тұрғындардың негізгі күнкөріс көзіне айналған тәтті түбір өңдеу қалыпты жұмыс істеуде. Биыл аудандағы 110 шаруа қожалығы 2200 гектарға қант қызылшасын септі. Қазіргі таңда өнім жинау аяқталды. Бүгінде 82 мың тонна өнім зауытқа өткізілді.
«Алдағы 2025 жылы ауданның 2350 гектар жеріне қант қызылшасын себу жоспарланды. Бүгінде 1960 гектарға сүдігер жыртылды. Жерді тиімді пайдалану негізгі мақ-сатымыз. Аудан аумағындағы пайдаланылмайтын немесе мақсатты пайдаланылмаған жерлерді мемлекет меншігіне қайтару жұмыстары жалғасын табуда. Жоспарланған 15 мың гектардың 13,4 мың гектары аудандық жер қорына қайтарылды», – деді аудан әкімі Берік Тынышбаев. Ол атқарылып және алда атқарылатын мәселелер жөнінде де сөз қозғады.
Биыл Суықсай, Н. Есеболатов, Көшкентал ауылдық округтерінде 3 модульді ветеринарлық пункт пайдалануға берілген.
Аудан бойынша негізгі қорға тартылған инвестиция көлемі 34 млрд. 409 млн. теңгегені құраған. Жыл соңына дейін 13,5 мың м2 тұрғын үй пайдалануға берілмекші. Биыл жеке инвесторлардың қаражаты есебінен әлеуметтік осал топтарға 59 үй берілгендігі де қуанарлық жайт. Ауданда атқарылып жатқан шаруа жетерлік. Ауызсу тарту, Мәдениет үйлерін салу, жаңа мектептер тұрғызу, жолдар жөндеп, жарықшамдар тарту кезең-кезеңмен іске асырылуда.
Баспасөз конференциясында аудан әкімі Берік Тынышбаевқа журналистер тарапынан сұрақтар қойылды. Қызыл- ағаш су қоймасының бүгінгі жағдайы, судың жиналуы жайында тілшілер әкімнен ақпарат сұрады. Спикер судың деңгейі көтерілгенін, былтырдан бері шаруа қожалықтары пайдалана бастағанын айтты.
Сондай-ақ, журналистер Жетісудағы алғашқы қазақ мектебі «Маманияның» орны шаруа қожалықтарына беріліп кеткенін, Маман-Тұрысбек әулеті салған білімнің қара шаңырағының орны жайылымға айналғанын айта келіп, руханиияттың ордасының жұрты қарауға алынса деген сауалдарын жолдады. Алғаш қазақ романына бәйге жариялаған Есенқұл қажы да осы жерде ғұмыр кешкенін айта кету керек. Аудан әкімі Берік Тынышбайұлы бұл мәселені алдағы уақытта қарастыратынын жеткізді.
Брифингте ел-жер мәселесіне байланысты көптеген сауал қойылып, шешу жолдары айтылды.
Гүлжан ТҰРСЫН
