Қыс мезгілі – шаңғы спорты үшін қолайлы шақ. Райымбек ауданындағы Сарыжаз ауылында білім ордасында шаңғышылар секциясы жұмыс істейді. Шаңғышылардың аудандық, облыстық жарыстары да осынау қарсауыт Сарыжаз өңірінде өтіп тұрады.
Ғасыр ақыны Мұқағали Мақатаевтың 90 жылдығына орай 1 және 11-сынып оқушылары арасында шаңғышылардың ауыл ішілік жарысы болып өтті. «Сарыжаз – Қаракет» қоғамдық бірлестігі қолдау көрсеткен бұл жарысқа ауылда тұратын спортсүйер, әсіресе, шаңғы спортын жақсы көрер жасөспірімдер қалмай қатысты. Күн жадырап, көктемнің жылылығы да сезіле бастаған керемет уақытта ауыл тұрғындары балғын шаңғышылардың жарысын тамашалап, көңілді демалып қайтты. Жарыс жеңімпаздарын «Сарыжаз –Қаракет» қоғамдық бірлестігінің мүшелері Мақтау қағаздарымен және бағалы сыйлықтармен марапаттады. Шаңғышылар жарысына негіз қалаған жандар алдағы уақытта аудандық деңгейде жарыс өткізуді жөн көріп отыр. Бәрекелді!
Қанат БІРЖАНСАЛ
