Бейсен Құранбек атындағы Журналистер үйінде Жетісу облысы әкімі аппаратының Әдеп жөніндегі уәкілі Ғабит Тұрсынбай азаматтық қоғам және бұқаралық ақпарат құралдары өкілдері үшін Ашық есік күнін өткізді. Өз қызметінде «Қазақстан Республикасының мемлекеттік қызметі туралы», «Сыбайлас жемқорлыққа қарсы іс-қимыл туралы» Қазақстан Республикасының Конституциялық заңдарын, Қазақстан Республикасы Нормативтік-құқықтық актілерін, Әдеп кодексін, Қазақстан Республикасы Президентінің Жарлығымен бекітілген Әдеп жөніндегі уәкіл туралы ереженің орындалуын басшылыққа алатын Әдеп жөніндегі уәкіл «Қазақстан Республикасының мемлекеттік қызметі туралы» Заңының 10-бабында белгіленген негізгі міндеттерді және функцияналдық міндеттерді атқаруы тиіс.
Ғабит Тұрсынбайдың айтуынша, жыл басынан бері облыста 17 мемлекеттік қызметші тәртіптік іс жөнінде жауапкершілікке тартылған. Оның алтауы мемлекеттік қызметші лауазымына кір келтірген деп танылған. Ал 11 қызметкерге Әдеп кодексінің тармақшаларын бұзғаны үшін ескерту беріліп, сөгіс жарияланған. Әдеп жөніндегі уәкіл мемлекеттік қызметшілерге Қазақстан Республикасының мемлекеттік қызмет, сыбайлас жемқорлыққа қарсы іс-қимыл саласындағы заңнаманың және Әдеп кодексінің талаптарын сақтау мәселелері бойынша консультациялық көмек көрсетумен де айналысады. Уәкіл өз сөзінде қызметшілердің киім киюі, кез келген жағдайда сабырлылық танытуы, басшылық тарапынан «ананы өйте сал, мынаны бүйте сал» деген бармақ басты, көз қысты әрекетке көнбеу, жан-жағындағыларға өктемдік танытпау, сөйлеу әдебін сақтау секілді талаптар қойылатынын айтты. Кей жағдайда уәкілетті орган тарапынан мекеме қызметкерлері арасында анонимді сауалнама жүргізіп, басшылықтың қызметкерлерге деген қарым-қатынасын білу шаралары жүзеге асырылатынын да жеткізді.
Әр адам тұлға. Сондықтан Әдеп жөніндегі уәкілдің бір міндеті – өзіндік пікірі, көзқарасы бар маман тәрбиелеу. Қоғамды рулық, ағайындық, бюрократтық жүйеден тазарту.
Ашық есік күнінде басшылардың өз қызметін асыра пайдалануға жол берілмейтіні айтылып, кез келген қызметші әдеп нормасы бұзылған жағдайда әдеп кеңесіне хабарласа алатыны еске салынды. Ашық есікке келген Жұмабала Балақаранова мемлекеттік қызметшілер тіл мәселесіне көңіл бөлсе деген тілек-талабын білдірді. Бұған жауап берген Ғабит Тұрсынбайұлы кез келген адам қай тілде сауал қойса маман сол тілде жауап қайтаруы тиіс екендігін ұғындырды.
Мемлекеттік қызметшілердің іскерлік әдеп пен ресми мінез-құлық қағидаларын сақтауы, құмар ойын мекемелеріне барудан тартынуы және әріптестеріне өзінің діни нанымын таңбауы, қол астындағы қызметшілерді діни бірлестіктердің қызметіне қатысуға мәжбүрлемеуі тиіс екендігі де назардан тыс қалмады.
Сондай-ақ, мемлекеттік қызметшілер арасында іс-шаралар өткізіліп, агенттік әзірлеген материалдар мен бейнероликтер көрсетілетіні сөз болды. Нәтижесінде қызметшілерге аталған құқықбұзушылықтың салдары қандай болатыны ескертіледі. Уәкілдің айтуынша, мерекелер қарсаңында шараларды ұйымдастырып, өткізу және қызметтен тыс уақытта қоғамдық тәртіпті сақтау бойынша аудан, қала әкімдері мен облыстық басқармалардың басшыларына нақты тапсырмалар беріледі. Әкімшілік мемлекеттік қызметші өзіне жүктелген міндеттерді орындамаған және тиісінше орындамағаны, сыбайлас жемқорлық құқықбұзушылық жасағаны, лауазымдық өкілеттігін асыра пайдаланғаны, мемлекеттік және еңбек тәртібін бұзғаны үшін, сондай-ақ, «Қазақстан Республикасының мемлекеттік қызметі туралы» Заңында белгіленген, мемлекеттік қызметке байланысты шектеулерді сақтамағаны үшін Қазақстан Республикасы Президентінің Жарлығымен бекітілген тәртіптік жазаға тартылады.
Ашық есік күні бұқаралық ақпарат құралдары өкілдері де жұмыс барысында кездесетін келеңсіздіктер жайлы айтты. Бюрократтық жүйенің әлі де белең алып отырғандығын, осы мәселе жайында жеке әңгімелессек деген ұсыныстарын білдірді. Бұл орайда Әдеп жөніндегі уәкіл мәселе анықталса жауапты адамға шара қолданылатынын айтты.
Гүлжан ТҰРСЫН
