Еліміздің өркендеуі қоғамдағы әділеттілік, адалдық, жанашырлық сынды адами қасиеттерге тікелей байланысты. Осыны жақсы білетін Президент Қасым-Жомарт ТОҚАЕВ биылғы «Әділетті мемлекет. Біртұтас ұлт. Берекелі қоғам» атты Жолдауында Жаңа Қазақстанның жолы әділеттілікке құрылуы тиістігін атап өткен еді. Соған сәйкес күллі Қазақстан бойынша жұмыстар жүргізіліп, билігі пен байлығының күшімен ауқымды жерді иеленіп алғандар халық мұрасын кері қайтарып жатыр.
Соңғы мәліметтерге қарағанда елімізде 3,2 миллион гектар жер мемлекет меншігіне қайтарылған. Оның 3 миллион гектары жайылым болса, 223 мың гектары егістік алқабы екендігін Ауылшаруашылық министрі Ербол Қарашөкеев хабарлаған.
Бұл еліміздегі жағдай. Енді Жетісу облысының бір пұшпағы саналатын Кербұлақ ауданына тоқталсақ, биыл жыл басынан бері анықталған 132 мың гектар пайдаланылмай жатқан жердің 9,4 мың гектарға жуығы мемлекет меншігіне қайтарылған. Осы мөлтек мәліметтің өзі ауданда ауқымды жұмыс атқарылып жатқанынан хабар берсе керек.
Ел мен жердің өркендеуі, мемлекет пен қоғамның дамуы барша халыққа байланысты. Бірақ жақсылықтың ұйытқысы болып, оң қадамға басу басшының адал ниетінен, жанашыр пейілінен, қамқор көңілінен бастау алады. Кербұлақ ауданының әкімі Қанат Есболатов жаңашыл, мемлекетшіл, отаншыл жас. Әкімдік міндетті алған күннен бастап, жар құлағы жастыққа тимей аудандағы өзекті мәселелерді шешуге кірісіп кетті. Жергілікті жұртшылықтың ауызсудан, жайылымнан таршылық көрмеуі үшін күрмеуі қиын, түйіні қатты мәселелерді біртіндеп шеше бастады. Облыс әкімі Бейбіт Исабаев алғаш Қанат Болатұлын аудан активіне таныстырған кезде ауданға ауылшаруашылық саласын жақсы білетін маман керегін, жайылым мен егістіктің, тәлімі жер мен суармалы жердің айырмашылығын ажырататын, төрт түлік өсіруге мемлекеттен беріліп жатқан қолдауды жетік меңгенрген жетекші ретінде ұсынғанын айтқан болатын. Содан бері өңірдің өзекті мәселелері – ауызсу, мал жайылымы, егістік жерлер, қараусыз қалған су қоймалары сынды салалардың жұмысын біртіндеп реттеліп келеді. Тоғыз жолдың торабында жатқан Сарыөзек кентіндегі теміржол тұйығына келетін көмірдің жетіспеушілігін болдырмаудың өзі біліктілікті, білімді талап етеді. Жылда жылыту маусымы жақындағанда жағатын отын таппай тулаған жұртшылықтың дүбірі орталықтан асып, күллі республикаға таралып жататын. Биыл ондай жаманаттан ада.
Аудан орталығында таза ауызсудың жетіспеушілігі сонау Кеңес одағынан қалмай келе жатқан мәселе. Тәуелсіздіктің алғашқы жылдарында тоқырауда жылтырап аққан суды үнемдеген жұрт соңғы жылдары су жинақтау резервуарының жаңарып, кент көшелеріне пластик құбыр тартылғанына куә болды. Алайда Сарыөзектің көшесіне су жеткізу тығырыққа тірелгендей күй кешкенін жасыра алмайсыз. Бірде құбыр жарылса, екіншіде бір көшеге су жетпей қалады. Қысқасы, осындай түйткілді тақырыпты белсенді тұрғындар әлеуметтік желіге жүктеп, жергілікті билікті әбігерге түсіргені тағы рас. Осындай өзекті мәселелердің шешуін табу оңай емес. Одан бөлек, Сарыөзек – Көктал бағытындағы автожолдың тозығы жеткені, ауданды табиғи газбен қамтамасыз етудің қажеттігі, мәдениет, білім, денсаулық сақтау салаларын жаңғырту, жаңарту сынды жұмыстарды жүргізудің маңыздылығы аудан әкімінің мойнына түседі. Сондықтан жауапкершілік жүгі ауыр.
Жақында Кербұлақ ауданының орталығында тұрғындармен кездесу өткізген облыс әкімі Бейбіт Исабаев елді толғандырған сұрақтардың шешуді орынбасарлары мен аудан әкіміне, облыстық басқармалардың басшыларына тапсырды. Солардың қатарында аудан халқының қамы алдыңғы орында тұрды. Көпшіліктің соңынан сөз алған жергілікті белсенді Ермек Сансызбаев аудан әкімі Қанат Есболатовтың жұмысына оң баға беріп, ел мен жердің мүддесі үшін жасалып жатқан жанашырлықты дұрыс бағамдады.
Иә, ең әділ баға – халықтың бағасы. Жергілікті белсендінің сөзі көптеген мәселенің бетін ашқандай әсер қалдырды. Сондықтан келешекте Кербұлақ ауданының жұлдызы жанып, тіршіліктің түйткілді тақырыптары жойыларына сенім мол. Халқымызда тәлімге шақыратын мақал-мәтел баршылық. Соның бірі:
«Жаны жақсы ағаның,
Етегін баспа, жолын қу.
Болайын деген баланың,
Бетінен қақпа, белін бу» – дейді. Рас сөз.
Ендеше, жақсылыққа жаңаша бағыт алған Кербұлақ ауданының келешегі кемел, болашағы баянды болуы жолында еңбектенген жанашыр азаматтардың алар асуы асқақ болсын!
Мәди АЛЖАНБАЙ,
Жетісу облысы
