Облыс орталығында ҚР Ұлттық экономика министрлігі Табиғи монополияларды реттеу комитетінің Алматы облысы бойынша департаменті және «ТАЭТК» АҚ ұйымдастыруымен баспасөз туры өтті. Шарада инвестициялық бағдарламаның орындалуы және активтерді жаңғырту барысы қаралды.
«ТАЭТК» АҚ жыл сайын өз желілерін қайта жаңалау мен модернизациядан өткізеді. Тур қатысушылары модернизациядан өткен желілердің бірінде болды. Ұйымдастырушылар биыл жаңартудан өткен «Шығыс» шағынауданы Құсайынов көшесіндегі трансформатордың жұмысымен таныстырды.
Биыл 6 нысан күрделі жөндеуден өтіп, электр желілері жаңаланды. Соның арқасында енді бұл елді мекендер жарықтың жиі сөніп қалуы мен сымдардың тұйықталуынан болатын қатерлерден құтылды. Бұл жұмыстарға облыс қазынасынан 685 100 теңгедей қаржы жұмсалды. Соның арқасында аймақ тұрғындарының 80 пайызы бүгінгі таңда жаңартылған желімен үздіксіз электр қуатын тұтынып отыр. Биыл жоспар бойынша жыл соңына дейін облыс көлемінде шіріп, қисайған бағаналары үзіле-үзіле жамау болған сымдар мен ескі трансформаторлар жаңарады.
– Біздің құрал-жабдықтар сапалы күтімді қажет етеді. Мамандар жоғары қуатта үзілген сымдарды жалғауда, жөндеу жұмыстарын жүргізуде қырағылықты жоғары қояды. Көптеген желі 60-шы жылдары қойылып, бүгінгі күнге дейін қызмет етуде. Барлық желілер күрделі жөндеуді және толық ауыстыруды қажет етеді. Бірақ бұл мүмкін емес. Өйткені шығындар тарифтің көтерілуіне алып келеді. Бүгін болмаса да ескірген желілер өз кезегімен ауыстырылу үстінде. Біздің ұжымда зейнет жасына жақындаған жұмысшылар бар. Дейтұрғанмен, соңымыздан ерген жастар да жетерлік. Жыл сайын мекеме мен жергілікті оқу орындарының келісімімен жас мамандар мекемеде тәжірибеден өтіп, қажетті мамандар салада жұмысқа қалып жатыр, – дейді «ТАЭТК» АҚ-ның өндіріс жөніндегі басқарушы директоры Серғазы Желдібаев.
Серғазы Бекенұлының айтуынша, инвестициялық бағдарламаны енгізу электр қуатының үздіксіз берілуін қамтамасыз етеді. Сондай-ақ, өз-өзінен сөніп қалу мен нормативтік-техникалық жоғалтудың алдын алады.
Айта кетерлігі, «ТАЭТК» АҚ – электр энергиясын тасымалдау және таратумен айналысатын бірден-бір мекеме. Құрамында 11 аудандық желілер және 29 бөлім бар. Электр энергиясы жалпы ұзындығы 12 285 км. желі арқылы таралады.
Еңлік АРЫҚБАЙ
