Кейінгі уақытта ауданда әлеуметтік нысандар көптеп салынып, халық игілігіне берілуде. Осы сөзіміздің айғағындай Аманбөктер ауылында жаңадан салынған блокты-модульді медициналық пункт пен блокты-модульді әкімдік ғимараттары салтанатты түрде ашылды.
Емдеу мекемесінің негізгі міндеті алғашқы медициналық көмек көрсету, сондай-ақ санитарлық-алдын алу іс-шараларын жүргізу болып табылады. «Ағаш-Темір-Бетон» ЖШС-нің құрыш қолды құрылысшылары медициналық пункттің құрылыс жұмыстарын 27 мамыр күні бастап, бүгінгі күні қолданысқа берді. Құрылысқа жергілікті қазынадан бөлінген 49 млн, 728 мың теңге толық игеріліп, жаңа нысан халық игілігіне ұсынылды.
Бүгінгі таңда медициналық пункттің 3 қызметкері міндеттерін адал атқаруымен көпшіліктің көңілінен шығуда. Аталған әлеуметтік нысанда медициналық көмек көрсетуге және қабылдауға, медициналық емшараларға арналған, екпе бөлмесі және әйелдерді қарау бөлмесі орналасқандығын көзімізбен көріп, көпшілікпен бірге көңіліміз демделіп қалды.
Пайдалануға берілген қос нысанның бірі — жергілікті атқарушы билік қызметкерлері отыратын блокты-модульді әкімдік. Аталған ғимараттың құрылысын да «Ағаш-Темір-Бетон» ЖШС атқарыпты. Құрылыс жұмыстары ағымдағы жылы 1 шілде де басталып, бүгінгі күні қолданысқа беріліп отыр. Жаңа нысанның бой көтеруіне жергілікті қазынадан 49 млн 660 мың теңге қаражат жұмсалған. Осы блокты-модульді әкімдік ғимаратының жылыту жүйесі электр қуаты арқылы жүзеге асырылады.
Аталған ауылға барып қос ғимараттың ашылу салтанатына қатысқан аудан әкімі Ғалымжан Маманбаев жергілікті тұрғындардың қуанышына ортақтасты.
«Халық денсаулығын жақсартып, ұлт сапасын арттыру – мемлекеттің негізгі міндеті. Елімізде медицина мамандарының мәртебесі мен беделі жоғары болуы үшін барлық жағдай жасалуда. Мемлекет басшысы Қасым-Жомарт Тоқаев денсаулық сақтау саласына әрдайым айрықша көңіл бөліп келеді. Медициналық қызметтің қолжетімді болуын қамтамасыз ету, денсаулық сақтау инфрақұрылымын одан әрі жаңғырту үшін кешенді іс-шаралар қабылдануда. Сонымен қатар жергілікті билік тарапынан халықтың әлеуметтік жағдайын жақсартып, басқа да қажетті нысандардың бой көтеруіне көңіл бөлінуде. Жаңа ғимарат баршаңызға құтты болсын!», – деді Ғалымжан Қанатұлы.
Салтанатты жағдайда жаңа дәрігерлік пункттің лентасын қию құрметі аудан әкімі Ғалымжан Маманбаев пен ауыл азаматы Орынбек Садуақасұлына, ал жаңа әкімдік ғимаратының лентасын қию құрметі ұзақ жыл ауыл әкімдігінде бас маман болып, зейнеткерлікке шыққан Варвара Рахимоваға берілді.
Осы уақытқа дейін ауыл тұрғындарына дәрігерлік көмек ескі ғимаратта көрсетіліп келсе, ал әкімдік ғимараты заман талабына сәйкес келмеген болатын. Еліміздің еңсесі түзелетін жаңа дәуірдің шарапатын сезінген ауылдықтардың шаттығына куә болу ғанибет емес пе!
Жақсылық ЖОМАРТҰЛЫ
Сарқан ауданы
