Әлемге танымал қазақстандық әнші Димаш Құдайберген Нью-Йорктегі әйгілі Madison Square Garden аренасында жеке концертін өткізді, – деп хабарлайды 7-su.kz ақпараттық порталы Stan.kz сайтына сілтеме жасап.
Әнші әлеуметтік желідегі парақшасында бұл кештің өз өміріндегі ең жарқын оқиғалардың бірі болғанын атап өтті:
«Мыңдаған жүрек. Бір тыныс. Бұл түн тарихта да, менің жанымда да мәңгі қалады. Бұл арманды менімен бірге бөліскендердің бәріне рақмет! Менің командам, музыканттар, көрермендер және осы сапарға сенген барша жанға алғыс айтамын! Музыка бізді біріктірді. Қазақстаннан Америкаға дейін, жүректен жүрекке, жаннан жанға. Осы концерт туралы деректі фильм түсірілді. Бұл сапар, сәттер және бірге сезінген қуат туралы. Жақында…», – деп жазды Димаш Құдайберген.
Концерт алдында әншіні жанкүйерлері Нью-Йорк әуежайынан ерекше ықыласпен қарсы алған. Dears қауымдастығы Димаштың әндерін қосып, биыл жазда хитке айналған «Tau Ishinde» туындысын бірге шырқаған.
Әншіні көрген сәтте жанкүйерлер оны ду қол шапалақпен қарсы алып, гүлдер мен сыйлықтар тарту етті. Халық әртісі олармен емен-жарқын сөйлесіп, қолтаңба беріп, бірге суретке түсті. Сондай-ақ, жанкүйерлермен бірге әйгілі «Besame Mucho» әнін орындады.
