Қазақ ғылымы мен зиялы қауымы ауыр қазаға ұшырады. Белгілі ғалым-биолог, биология ғылымдарының докторы Рауза Минлиахмедқызы Қонаева 92 жасына қараған шағында өмірден өтті. Бұл туралы Д.А. Қонаев атындағы Халықаралық қор мәлімдеді, – деп хабарлайды 7-su.kz ақпараттық порталы.
Рауза Минлиахмедқызы 1934 жылы Алматы облысының Шілік ауылында, ел мақтанышы Дінмұхамед Қонаевтың отбасында дүниеге келген. Ол Минлиахмед пен Зәуре Қонаевтардың он бірінші, яғни ең кенже перзенті еді. Үлкен әпкесі Әминадан 27 жас кіші болған Рауза ханым ағалары мен әпкелерінің қамқорлығында, зиялы ортада тәрбиеленді.
Рауза Қонаеваның білім жолы Мәскеудегі атақты М.В. Ломоносов атындағы мемлекеттік университетте басталды. 1956 жылы биология-топырақтану факультетін бітіргеннен кейін, ол саналы ғұмырының 60 жылын (1957-2016 жж.) Қазақстан Ғылым академиясының жүйесінде қызмет етуге арнады.
-
Биохимия институтында (26 жыл);
-
Молекулалық биология және биохимия институтында (33 жыл) абыройлы еңбек етті.
Оның биохимия саласындағы еңбектері тек Қазақстанда ғана емес, шетелдік ғылыми ортада да жоғары бағаланған. Әріптестері оны терең білім иесі ғана емес, кісілік келбеті кемел, қарапайым әрі ізгі ниетті тұлға ретінде еске алады.
Рауза Минлиахмедқызының өмірлік серігі де елге танымал тұлға көрнекті заңгер Мұрат Баймаханов болды. Екі зиялының шаңырағында тәрбиеленген қыздары Дина Баймаханова да бүгінде әке жолын қуып, заң ғылымдарының докторы, профессор атанып отыр.
Рауза Қонаеваның бейнесі қазақ ғылымының тарихында және текті әулеттің шежіресінде мәңгі сақталмақ.
