Елімізде жұмыссыздықтың жолын кесіп, әлеуметтің әлеуетін арттыру жолында жасалып жатқан мемлекеттік бағдарламалар мен игі бастамалар аз емес. Соның нәтижесінде екі қолға бір күрек таба алмай жүрген азаматтар аудандық жұмыспен қамту орталығына жүгіну арқылы жұмыссыздықтың күрмеуін тарқатып, еңбекке араласу мүмкіндігін алған.
– Биыл жыл басынан бері орталыққа 3660 адам жүгінді. Олардың 3298-і жұмыс іздеп келгендер. 1735 адамға жұмысқа орналастыру жөнінде көмек көрсетілді. Дені қоғамдық жұмыстарға тартылды, – дейді аудандық жұмыспен қамту орталығының бөлім басшысы Эльвира Құрманова. – Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасы бойынша ауданда 3 бағыт іске асырылуда. Тарқатар болсақ, «Бағдарламаға қатысушыларды техникалық және кәсіптік біліммен және қысқамерзімді кәсіптік оқумен қамтамасыз ету» деп аталатын бірінші бағыт бойынша жыл басынан бері 493 адам оқуға жіберілді. Негізінен мұндағы жоспар 425 адам болатын. Бұл бағдарламаға қатысушылар оқуына ақы төлеу бойынша мемлекеттік қолдаумен, бір реттік ыстық тамақ, жол жүру ақысымен қамтамасыз етіледі. Осындай жеңілдіктер барын білген соң, әсіресе, жастардың қызығушылығы артқаны аңғарылады. Оған қоса, қазіргі уақытта, бағдарламада көрсетілгендей, техникалық және кәсіптік мамандықтарға сұраныс жоғары.
Аталған бағдарламаның екінші бағыты – жаппай кәсіпкерлікті дамытуды жүзеге асыру бойынша 35 адам ниет білдірген. Олардың арасында «Бастау бизнес» жобасы бойынша кәсіпкерлік негіздерін оқып, шағын несие алып, кәсіпкерлікке қадам басқандары да бар. Атап айтсақ, Тұздыбастау ауылының тұрғыны Сайлаубек Байымбетов былтыр осы бағдарлама бойынша 6,0 миллион теңге шағын несие алып, оған бие сатып алып, қымыз өндіруді бастап кеткен. Ал Талғар қаласының тұрғыны Жанар Кеңесова болса, өткен жылы «Бастау-бизнес» кәсіпкерлік негіздерін оқыту жобасы бойынша оқу бітіріп, жеке кәсібін бастау үшін фотостудияға 240 мың теңге көлемінде мемлекеттік грант алған. Кәсібін кеңейтуді көздеген жас кәсіпкер биыл аталған бағдарламаның екінші бағыты шеңберінде балабақша ашу мақсатында құрал-жабдықтар алуға 3,9 млн. теңге көлемінде несие алып, мақсатты жұмысын бастап та кеткен.
Жаппай кәсіпкерлікті дамыту бағыты бойынша шағын несие алуға атаулы әлеуметтік көмек алатын отбасылар да ниетті көрінеді. Соның бірі Кеңдала ауылының тұрғыны, үш баланың анасы Гүлмира Момбаева. Отбасының ырыс-несібесін арттыруды діттеген ол кәсіптің тетігін тауып, осы жылы 5 млн. теңге несие алып, кәсібін бастағанына қуанышты. Осы орайда, ауданда 5629 отбасы атаулы әлеуметтік көмекке қол жеткізген. Олардың ішінде 4 отбасы қайтарымсыз грант алғандар қатарында.
– «Еңбек» бағдарламасының үшінші бағыты – халықты жұмыспен қамтуға жәрдемдесу және еңбек ресурстарының ұтқырлығы арқылы еңбек нарығын дамыту. Бұл бағыт «әлеуметтік жұмыс орындарын құру», «жастар практикасын ұйымдастыру» және «қоғамдық жұмыстарды ұйымдастыру» тетіктері бойынша жүзеге асырылады. Осы салалар бойынша жыл ішінде 700-ден артық адам жұмысқа тартылды. Олардың дені қоғамдық жұмыстарға араласуда, – деген бөлім басшысы «Ауылшаруашылығын қаржылай қолдау қоры» арқылы 28 адамға жалпы сомасы 141,03 миллион теңге несие берілгендігін баян етті. Сондай-ақ, «Несие серіктестігі» акционерлік қоғамы арқылы 7 адам 20,05 миллион теңге несие алып, кәдеге жаратқан. Жалпы берілген несие сомасы 155,8 миллион теңгені құраған. Сонымен қатар, 90 адамға 36,600 миллион теңгенің мемлекеттік гранты берілгендігі де тілге тиек болды.
«Кәсіп түбі – нәсіп» деген емес пе?! Сан алуан кәсіптің керегесін кеңейтуге бағытталған мемлекеттік бағдарламалардың жүзеге асырылуы бірқатар еңбек орындарының ашылуына халықтың әл-ауқатын жақсартып, шағын және орта бизнестің дамуына оң ықпалын тигізуде. Шағын несие алу арқылы шаруасын дөңгелентіп отырғандардың барлығы да істерінің ілгері басып, жақсы нәтиже бере бастағанына дән риза.
