Президент Қасым-Жомарт Тоқаев Тошиаки Эндо бастаған Жапония Парламентінің Қазақстанмен достық лигасы мүшелерімен кездесу өткізді.
Кездесу барысында Мемлекет басшысы Достық лигасының қызметіне жоғары баға беріп, оны екіжақты ынтымақтастықты нығайтудың маңызды тетігі ретінде қарастыратынын атап өтті.
Президенттің айтуынша, Қазақстан Жапониямен жан-жақты әріптестікті одан әрі тереңдетуге ерекше мән береді. Соңғы жылдары парламентаралық диалог айтарлықтай жанданып, түрлі деңгейдегі байланыстар жүйелі түрде жалғасып келеді.
Еліміз Токиомен жан-жақты ықпалдастықты одан әрі арттыруға баса мән береді. Сауда-экономикалық және инвестициялық саладағы байланыстарымыз тың серпінмен дамып келеді. Жапония Қазақстандағы ірі инвесторлардың қатарына кіреді. Былтыр екі ел арасындағы тауар айналымы 2 миллиард АҚШ долларына жетті. Бұл – Жапонияның Орталық Азия елдерімен жалпы сауда көлемінің 70 пайызынан астамы. Сонымен қатар көлік-логистика, энергетика, ауыл шаруашылығы және басқа да бағыттар бойынша нақты жобалар жүзеге асырылып жатыр, – деді Қасым-Жомарт Тоқаев.
Мемлекет басшысы сондай-ақ Жапония Императоры Нарухитомен өткен кездесуде медицина мен су ресурстары саласындағы ынтымақтастық мәселелері талқыланғанын атап өтті. Президенттің пікірінше, екіжақты әріптестіктің әлеуеті жоғары, ал мәдени-гуманитарлық байланыстар терең тарихи тамырларға ие.
Қазақстан мен Жапония білім және ғылым, мәдениет пен өнер, спорт және туризм салаларында тығыз ықпалдастық орнатқан. Биыл Осака қаласында өткен Дүниежүзілік көрме аясында қазақтың ұлы ақыны, ойшылы Абай Құнанбайұлының туғанына 180 жыл толуы кеңінен аталып өтті.
Кездесу барысында Президент жаһандық өзекті мәселелерге қатысты Қазақстан мен Жапонияның ұстанымдары ортақ екенін атап өтті.
– Біз Біріккен Ұлттар Ұйымы және өзге де халықаралық ұйымдар аясында бейбітшілікті қамтамасыз ету, ядролық қарусыздану мәселелері бойынша бір-бірімізді тұрақты түрде қолдап келеміз. Қазақстан аймақаралық ынтымақтастықтың маңызды алаңы саналатын «Орталық Азия + Жапония» форматына айрықша мән береді. Алдағы Премьер-министр Санаэ Такаичимен өтетін келіссөздер саяси диалогты тереңдетіп, экономикалық және гуманитарлық байланыстарды жандандыруға серпін береді. Халықтарымыз өсіп-өркендеп, өзара тиімді әріптестігіміз одан әрі нығая береді деп сенемін, – деді Мемлекет басшысы.
